CEBU, Philippines - Gibanabanang mokabat sa 15 mil kapin ka mga tawo sa lungsod sa Cordova ang misugat ug mikuyog ni boxing promoter Rex "Wakee" Salud atol sa iyang pagsumiter sa Certificate of Candidacy (COC) aron pagpapiling mayor sa Cordova kagahapon sa buntag.
Kini bisan pa man sa mando sa Municipal Trial Court (MTC) sa Cordova nga nagbasura ni Salud isip residente sa lungsod sa Cordova.
Si Filmor Gomos, ang abogado ni Salud mipasabot nga dili pa final ang kamanduan sa korte gumikan kay aduna pa silay gisang-at nga motion for reconsideration kalabot sa desisyon ni MTC Judge Jocelyn Po.
Matud pa ni Gomos nga dunay mga affidavit nga ilang ikapamatuod nga nagpuyo si Salud sa barangay Cogon sa maong lungsod ug pipila ka residente ug opisyal sa barangay ang magpamatuod niini.
Ang COC ni Salud gidawat ni Arvin Maghanoy ang Comelec officer sa maong lungsod sa katarungan nga wala sa iyang gahom ang pag-disqualify sa usa ka kandidato nga mo-file sa ilang mga COC's.
Misugwak ang liboang supporters ni Salud diha sa San Roque Parish Church diin gihimo ang Santos nga Misa dayon nagpanon sa pag-adto sa Comelec diin mi-file sa iyang kandidatura si Salud.
Si Salud namahayag nga wala siya magtoo nga ingon niadto kadaghan ang tawo nga nagmahal kaniya sa maong lungsod bisan pa sa hugot nga protesta sa iyang mga kaatbang.
Si Mayor Adelino "Addy" Sitoy sa iyang bahin midistansiya kagahapon ug mipadayag nga dili siya buot nga magubot ang sitwasyon sa pagsumiter ni Salud sa iyang COC.
Matud pa ni Sitoy mopasaka siya og tulo ka kaso diin usa niini mao ang Cancellation of Candidacy ni Salud, Perjury sa bakak nga pamahayag ni Salud sa iyang COC kalabot sa iyang dapit nga gipuy-an ug ang contempt batok ni Salud ug sa mga sakop sa Comelec tungod sa pagsupak niini sa korte.
Kauban ni Salud nga midagan pagkabise mayor mao si Dr. Rowena Tongco, pagkakonsehal mao sila si Cora Borromeo, Dominador "Ador" Aytona, Rene Buntol, Manuel Biongcog, Johnson Tan III, Edwina Premaio ug Manuel Pacaldo. Gawas ni Salud ug Sitoy mitumaw ang mga balitang lakip sa mokandidato sa maong posisyon mao si incumbent Vice Mayor Rudy Jumao-as, incumbent Councilors Ceasar Suan ug Andres Dinoy. (BANAT NEWS)