Mag-uuma gitabanga'g patay sa amahan ug anak

CEBU, Philippines - Namatay ang usa ka mag-uuma nga gitabangan og bunal ug panigbas sa kontra niyang amahan ug anak didto sa Sitio Purok 7, barangay Bunga, sa siyudad sa Toledo niadtong Martes sa alas 3:00 sa hapon.

Ang biktima mao si Felix Hernane, 42, minyo, nga nagpuyo sa maong lugar, samtang ang   mga suspek nga iyang silingan mao sila si Leonardo Villarin, 57, minyo, ug ang anak niini nga si Francisco Villarin, 33 , minyo usab.

Si SPO4 Gil Lastimosa, Desk Officer sa Toledo City Police Station mibutyag sa Banat News nga ang biktima naglakaw sa dalan   duol sa pinuy-anan sa duha ka suspek nga iyang silingan dihang giatangan kini ug gitabangan og bunal og kahoy dayon gipanigbas sa nagkalainlaing bahin sa lawas nga maoy nabugtoan sa kinabuhi niini.

Ang 13 anyos nga anak sa biktima nga si Christopher kinsa nakasaksi sa gidangatan sa iyang amahan mitug-an atol sa pagsukit sukit sa kapolisan nga didto siya sa taas sa ilang balay dihang nakadungog siya sa tingog sa iyang amahan nga nangayo og tabang.

Sa iyang pagtambo sa bintana maoy nakita sa iyang duha ka mga mata nga gitabangan   sa mga suspek ang iyang amahan, usa ang mipuspos og dakong kahoy samtang ang usa mao usab ang migamit og pinuti nga gipanigbas sa nagkalainlaing bahin sa lawas sa biktima.

Nakita pa niya si Francisco nga maoy migamit og kahoy nga gipuspos sa ulo sa biktima samtang si Leonardo usab maoy mihapos sa iyang pinuti ngadto sa tiyan sa biktima ug sa ubang bahin sa lawas niini.

Gani nakita usab niyang migakos pa ang iyang amahan ngadto kang Leonardo kay nagpakiluoy nga dili lang siya patyon apan inay mohunong, labi pa hinuong giligid og tigbas ang biktima.      

Sa pagkatumba sa yuta sa biktima gihapsan pa gayud kini ni Fransciso sa kahoy   bisan nakita na nga mihutlay na ang biktima gitiwasan pa gyud ni Leonardo og panigbas ang lawas niini ug mibiya ang duha ka suspek dihang natino nila nga wala nay kinabuhi ang biktima.

Wala na hiabti sa kapolisan ang mga suspetsado apan pipila ka oras ang nakalabay mitahan sa ilang kaugalingon ang maong mga suspek ngadto sa kapolisan.

Atol sa pag-sukit sukit sa kapolisan ang amahan ug anak mitug-an nga napugos sila pagpatay sa biktima tungod kay matud nila kanunay silang hagisan niini ug panghagiton og away hinungdan nga ilang gi-unhan.

Kasong murder ang gipasakang kaso sa kapolisan batok sa mga suspek kagahapon sa hapon ug karon nagtingkagol na ang duha sa karsel. (/WC)(BANAT NEWS)