CEBU, Philippines - Gilauman sa mga kadagkoan s a Alay Lakad Foundation Inc. (ALFI) nga madugangan ang ilang kasuportahang scholars human mosaka ang ilang kinitaan sa Alay Lakad for a Cause sa miaging Domingo dinhi sa dakbayan sa Sugbo.
Kini ang gibutyag ni ALFI Executive Director Norman Tan sa Banat News kinsa nagkanayon nga mikapin sa 50,000 ka tawo ang misalmot sa maong kalihokan ug mikita usab sila og kapin sa P700 mil kapin gikan sa mga donasyon sa mga misalmot sa maong lakaw. Matud niya nga ang maong kalihokan gipahiuyon usab nila sa kasaulogan sa Alay Lakad Walk For A Cause 2012 dinhi sa syudad sa Sugbo.
Ang maong kalihokan giorganisar sa ALFI nga gitumong nga makabaton og dugang pundo ang maong pundasyon pinaagi sa mga donasyon niadtong adunay malumong kasing-kasing nga mga molupyo
Matud pa ni Tan nga dili gayud magmahay ang mga donor tungod kay ang kantidad nga ilang giamot itabang man usab ngadto sa mga estudyante nga gipili sa kagamhanan kinsa may katakus og pangutok apan kabus og ginikanan.
Miingon si Tan nga ang uban sa maong mga scholar mga batan-on nga nahunong na sa pagtungha gumikan kay wala nay ikasarang ang ilang mga ginikanan sa paggasto sa ilang pagtuon.
Sumala ni Tan nga sa miaging 36 ka tuig, ang maong pundasyon nagsilbing mahinungdanong instrumento sa pagtabang niadtong mga kabatan-onang buot moeskwela aron kahatagan gayud sila og maayong ugma pinaagi sa nagkadaiyang programa sa ALFI. Ang maong pundasyon partikular nga naghatag og pakabana ngadto sa mga batan-on pinaagi sa paghatag kanila og assistance sama sa scholarship grants sa high school o kolehiyo nga ilang nahimutangan.
Midugang siya nga ang ALFI maoy nagsilbing yawe aron makaeskwela usab ang mga out of school youth aron makabaton kini og hayag nga kaugmaon.
Sa pagkakaron may 24 ka mga scholar sa high school ug ang tulo usab ang anaa sa kolehiyo , na- enroll usab sa Cebu Technological University (CTU) ug usab Cebu Normal University (CNU). Ang ALFI nagplano nga mapalapdan pa ang ilang programa aron malakip usab kadtong mga nagtungha sa pribadong tunghaan kinsa nag-atubang og pinansyal nga problema nga maoy nakababag sa ilang pagtungha.
Gawas sa educational scholarship grants alang sa tinun-an sa high school ug kolehiyo ang ALFI nag-umol usab og ubang programa nga makahatag og dakong benepisyo ngadto sa mga kabatan-onan sama sa skills training program, livelihood training ug drug prevention seminar.
Tungod kay dugay naman kini nilang gitanyag ang maong educational scholarship program, ang ALFI sa pagkakaron aduna nay 3,000 ka mga benepisyaryo nga naglangkob na niadtong ilang gibansay ubos sa skills and livelihood program ug usab niadtong mga misalmot sa mga drug prevention seminar.
Gibutyag ni Tan nga ang maong pundasyon nakapadala na og 58 ka mga batan-on ubos sa ilang skills and livelihood training. Ang temang "Bawat hakbang Mo, Para sa Kinabukasan Ko Alay Lakad 2012, nakahipos og P700,000 nga donasyon gikan sa mikapin sa 50,000 ka tawo nga misalmot sa dinaghan nga lakaw dinhi sa dakbayan sa Sugbo. (WC) (BANAT)