Quisumbing mikuyog ni Alegado pagsang-at og COC

CEBU, Philippines - Si Mayor Teresa Alegado sa lungsod sa Consolacion uban ni   Vice Mayor Aurelio Damole sa Liberal Party   misang-at na sa iyang Certificate of Candidacy (CoC) sa buhatan sa Commission on Election (Comelec) sa maong lungsod nga gikuyogan gayud ni incumbent 6th District Representative Luigi Quisumbing.

Si Kongresista Quisumbing mipakita usab sa taga Consolacion ang pag-atiman niini dili lamang sa mga lungsoranon apan maingon man sa mga opisyal sa lungsod

Dugang nga misumitir sa ilang CoC ang kompletong line-up sa konseho ni Mayor Alegado nga gilangkoban sa upat ka mga incumbent nga konsehal ug laing upat ka mga bag-o pa nga mga mokandidato sa maong posisyon.

Samtang si kanhi mayor Avelino Gungob Sr., nga misumitir usab sa iyang CoC kagahapon sa buntag wala usab magpabintaha sanglit kuyog man usab niya ang basketbolista sa PBA ug kanhi konsehal sa dakbayan sa Mandaue nga si Elmer Cabahug nga mokandidato   usab isip board member sa 6th District ubos sa One Cebu Party.

Mikuyog kang Cabahug si kanhi 6th District Representative Nerissa Soon-Ruiz sa One Cebu Party nga maoy moatbang ni Quisumbing sa umaabot nga piniliay . Si Alegado atbangan usab ni Gungob kinsa nahimong mayor sa maong lungsod sulod sa tulo ka termino.

Gipahayag ni Gungob nga igo lamang niyang gisanong ang awhag sa katawhan sa kabarangayan sa maong lungsod nga pabalikon siya sa pagserbisyo isip mayor   aron ikapadayon niini ang wala matapos niyang mga proyekto nga iyang gibiyaan   sa pagkawagtang niya isip mayor sa Consolacion.

Samtang si Alegado sa iyang pamahayag miingon nga magpasubli siya sa katungdanan sanglit dako ang iyang tinguha nga mapadayon ang nasugdan niyang mga proyekto nga gitumong alang sa kalamboan sa lungsod.

Ang line-up nga mga konsehal ni kanhi mayor Gungob mao ang naglakip kang Leo Go nga kanhi mayor sa maong lungsod, Ember Alinsug nga kanhi bise mayor, Arnulfo Taboy Abinales nga kanhi konsehal, incumbent councilor Iluminado Alin ug Analee Gungob, Agustin Lloveras, Eusebio Cordova ug Leonardo Lagroma. (WC) (BANAT)