CITOM enforcers suholan patas-an aron way mangilkil?

CEBU, Philippines - Gipatun-an ni Mayor Michael Rama sa iyang city administrator kun mahimo ba nga umentohan ang sweldo sa mga traffic enforcers nga sakop sa City Traffic Operations Management (CITOM).

Tumong sa mayor nga malikay ang mga enforcers nga mangurakot pinaagi sa pagdawat og suborno gikan sa madakpang drayber samtang nagpatunhay og hapsay nga dagan sa trapiko.

Sila nagdawatan lang og suhulang sobra lang og gamay sa minimum nga suholan karon nga gilatid sa balaud nga gidudahang hinungdan nga dunay mga enforcers nga matintal gyud sa pagpangilkil sa mga drayber nga ilang madakpan.

Pipila ka drayber mitug-an sa Banat Manobela nga nawad-an sila’g respeto sa ubang traffic enforcers sa CITOM kay kusog kaayong mangwarta.

Ilang gibutyag nga ang uban dili maoy mangunay sa pagdemanda og suborno apan dili usab mobalibad kun tunolan og kuwarta basta di lang sakmiton ilang lisensya.

Si Rama miingon nga dihang bise mayor pa siya gisuwayan siya og suborno dihang dunay terminal nga gitukod dinhi sa siyudad aron lang dili lisudlisuron ang maong negosyo apan wala niya kini dawata.

Dihang nahimo na siyang mayor duna gihapoy susamang mga pagpanubornong misuway kaniya apan iyaha kining gibalibaran sa ngalan sa serbisyo publiko. (BANAT NEWS)