Batan-on gibuko-buko pagluba

CEBU, Philippines - Talandugon ang kahimtang sa usa ka bayong- bayong human kini bukobukoha pagdunggab sa wala hiilhing criminal samtang naglakaw   sa karsada didto sa sitio Inggauyok, barangay Tunghaan, sa lungsod sa Minglanilla niadtong Lunes sa kaadlawon. Ang biktima mao si Junel Abatayo Baritua, 16, nga nagpuyo sa maong lugar.

Si PO2 Abelardo Beton sa Minglanilla Police Station mibutyag sa Banat News nga ang biktima kauban sa barkada niini mitambong   sa disco party sa maong lugar nga nagsaulog sa pista sa maong higayon.

Apan nianang pagka -kaadlawon   samtang namauli na sila,   gisundan kini sa usa ka tawo nga armado og kutsilyo ug gihansakan   ang iyang buko-buko.

Human mosirit ang dugo sa samad, misirit usab og dagan ang kriminal pahilayo sa maong dapit ug wala na kini hiapsi sa mga barkada sa biktima .

Ila dayong gihatod ang biktima ngadto sa Minglanilla District Hospital apan gi-transfer    kini sa Vicente Sotto Memorial Medical Center (VSMMC) sa dakbayan sa Sugbo.

Ang kapolisan padayon pa sa ilang imbistigasyon ug gisubay ang tanang posibling anggulo nga magtumbok sa motibo sa krimen lakip na niini ang   posibilidad sa pagkalambigit sa fraternity kansang magkaribal nga mga sakop mao kanunay ang magpinatyanay. (BANAT NEWS)