CEBU, Philippines - Gipahimangnoan ni Mayor Michael Rama ang mga kaswal nga empleyado sa City Hall nga dili mouban sa kampanya sa kaatbang niya nga si Kongresista Tomas Osmeña sa Bando Osmeña Pundok Kauswagan kung gusto pa nilang ma-renew ang ilang kontrata sa panarbaho.
Nitak-op na kagahapon ang duha ka adlaw nga pakigtigom ni Rama sa kapin sa 5 mil ka mga empleyado sa Cebu City Hall diin iyang gipasabot nganong mibiya siya sa Liberal Party.
Sumala pa sa mayor nga hipokrito ra usab kaayo kung ipabilin niya sa City Hall ang mga tawo nga wala kauyon kaniya.
Sa laktod nga pagkaestorya gidid-an silang mag-apil-apil sa politika ug gidasig na lang niya kini nga mo-focus sa trabaho.
Samtang si Bise Mayor Joy Augustus Young wala na makugang sa gipadayag ni Rama kay matud niya hagbay ra kini nga gibuhat sa mayor nga wala i-renew ang mga empleyadong supporter sa BOPK. (BANAT NEWS)