Bag-ong Centcom commander milingkod

CEBU, Philippines - Hingpit na nga milingkod isip bag-ong Commanding General sa Central Command (CENTCOM) si Real Admiral Jose Luis Alano   nga maoy hulip ni outgoing AFP Commander Major General Jose Mabanta Jr.

Gipasalig ni Real Admiral Alano nga sa iyang paglingkod iyang ipadayon ang kahapsay ug kalinaw dili lang sa dakbayan sa Sugbo kundili sa tibuok Central Visayas

Matud pa ni Alano nga dili na bag-o kaniya ang Sugbo tungod kay ang iyang amahan usa man ka Boholano ug ang iyang inahan gikan sa Panay hinungdan   nga aduna na usab siyay kasinatian sa pipila ka lugar sa Central Visayas ilabi na sa Sugbo.

Dugang usab ni Alano nga usa sa iyang usbon sa pipila ka kalihukan sa armadong kusog sa Central Visayas mao ang pagpangusog sa pag-implementar sa ilang gitawag nga Internal Peace and Security Plan (IPSP) Bayanihan diin manginlabot gayud ang nagkadaiyang sector sa komunidad.

Samtang sa habig sa politika, gibutyag usab ni Alano nga ang kasundalohan sa Central Command nangandam na apan kinahanglan una silang makig-alayon sa Commission on Elections (COMELEC) ug Philippine National Police (PNP).

Apan masaligon usab nga gibutyag ni Alano nga ang iyang mga tawo andam kanunay   sa pagpatuman    sa kahapsay sa umaabot nga piniliay sa   sunod tuig.(Lesley Caminade-Vestil/WC)