Persona non-grata alang sa writer sa National Geographic

CEBU, Philippines - Kun siya ang pabut-on gusto ni Cebu Archbishop Emeritus Ricardo Cardinal Vidal nga ideklarar nga persona non-grata ang langyaw’ng writer sa National Geographic Magazine nga si Bryan Christy.

Kini kabahin sa kontrobersiyal nga isyu sa pagpalusot og mga illegal nga ivory gikan sa mga tango o sungay sa mga elepante gikan sa Africa dinhi sa nasud aron himuong mga rebolto sa mga Santos. Sa report sa TV Patrol Central Visayas, si Vidal mipadayag sa iyang kahiubos ngadto sa gibuhat ni Christy nga mihatag og bati nga imahe sa simbahan ug sa mga Sugbuanon tungod sa maong isyu.

Dismayado usab si Vidal sa pag-utingkay ni Christy sa daan nang isyu nga sexual abuse ni Msgr. Cris Garcia nga nahitabo niadtong 1988 didto sa Estados Unidos.

Si Vidal nag-andam na og mga dokumento nga iyang i-presentar ngadto sa Vatican City aron paghatag katin-awan sa maong isyu.

Miingon si Vidal nga andam siya mangatubang sa commission on faith and worship aron pagtubag sa maong isyu nga mitay-og karon sa simbahan.

Wa usab siya magdahom nga motumaw ang maong isyu karon nga nagsingabot na ang gipaabot nga canonization ni Blessed Pedro Calungsod sa Oktobre 21 didto sa Roma. Nanghinaut hinuon siya nga sama sa mga miaging kontrobersya, dili gihapon kini makaapekto sa pagtuo sa mga katoliko. (Lemuel Maglinte/EIM) (BANAT NEWS)