RDC moumol og nagkalainlaing proyekto

CEBU, Philippines - Gipasalig sa Regional Development Council (RDC) 7 nga moumol sila og nagkalain-laing proyekto alang sa pagpalambo pa sa nasudnong ekonomiya partikular na sa Region 7.

Kini ang giluwatan ni Manlalaban Buenaventura C. Go-Soco Jr., Regional Director sa National Economic Development Authority (NEDA) 7 ug usab Vice chairman sa RDC 7 sa pakighinabi sa Banat News.

Matud pa ni Soco nga ang RDC 7 maoy naggama og sistema sa   pag-analisar sa mga proyekto nga   angay ipatuman alang sa pagpausbaw sa lokal nga ekonomiya dinhi sa Central Visayas.

Midugang siya nga hatagan gayud nila og dakong pagpakabana dili lamang ang bahin sa pagpalambo sa ekonomiya apan lakip na usab ang pagpaminus sa kakabus pinaagi sa paghatag og dugang kahigayonan sa trabaho sa mga kabus nga molupyo.

Gibutyag usab ni Soco nga ang rehiyon 7 usa sa nagbaton og paspas nga pagsaka sa ekonomiya gawas sa National Capital Region (NCR) diin nakakuha kini og 2.5 porsiyento sa tuig 2010 samtang 7.9 porsiyento ang nakuha niini sa tuig 2011.

Gitug-an niya nga ang siyudad sa Sugbo, siyudad sa Lapu-lapu, ug usab siyudad sa Mandaue ang mga nag-unang tinubdan sa kusog nga pagtubo sa ekonomiya.

Gipaniguro sa RDC 7 nga iimplementar ang mga nagkadaiyang proyekto nga makahatag og dako kaayong kauswagan sa panginabuhi sa mga molupyo dinhi. (Liezl M. Frasno-Correspondent/WC)