CEBU, Philippines - Nanumpa atubangan ni Governor Gwendolyn Garcia ang gibanabanang 10 mil ka mga Dumanjuganon isip mga miyembro sa One Cebu Party sa miaging Biyernes.
Ang maong pundok sa nanumpa gipangulohan mismo ni Dumanjug Mayor Nelson Garcia, Rene Asentista, ang runningmate ni Mayor Nelson sa 2013 election, mga kauban sa konseho sa Dumanjug ug ang kinabag-ang duot sa mga Dumanjuganon nga mihugop gayud ngadto sa Dona Josefa Paras Garcia Heritage Park.
Sa maong kalihokan mitambong usab ang ubang mga haligi sa One Cebu Party, nga sila si Deputy Speaker sa Kongreso ug 2nd district Representative Pablo Garcia, One Cebu Gubernatorial Candidate Pablo John “Pj” Garcia, ug Vice Gubernatorial Candidate Ramon Boboy Durano IV. Atol sa pagpamulong ni Mayor Nelson Garcia iyang gidasig ang tanang molupyo sa Dumanjug nga lauman ang magbaha pang mga maayong proyekto nga matagamtaman nila gikan sa pamunoan sa One Cebu Party busa angay kini nilang suportahan sa umaabot nga election.
Samtang si One Cebu Guvernatorial candidate Pablo John PJ Garcia nagkanayon nga siya ang mopadayon sa tanang nasugdang programa ni Governor Gwen nga alang sa kauswagan sa mga molupyo nga Sugboanon. (BANAT NEWS)