Alcover mihatag og tag P500M sa mga kapitan sa Tabogon

CEBU, Philippine s- Gipanghatagan ni Anad Partylist Representative Pastor “Jun” Alcover Jr., og tag P500 milyones nga balor sa mga proyekto ang mayoriya sa mga kapitan sa lungsod sa Tabogon.

Si Kongresista Alcover nagkanayon nga iya kining gihimo aron usab tabangan ang iyang anak nga si kanhi konsehal Lemar Alcover nga magpapili pagka mayor sa maong lungsod.

Si Kongresista Alcover nga misuroy sa mga kabarangayan sa Tabogon sa miaging adlaw personal nga miawhag sa mga molupyo didto nga suportahan ang iyang anak sa umaabot nga eleksyon dungan ang pasalig nga mas dugang pang proyekto gikan sa iyang pork barrel ang ibubo sa maong lungsod aron makamugna og dugang proyekto nga ikaayo sa katawhan sa maong lungsod.

Matud ni Kongresista Alcover nga ang lungsod sa Tabogon maoy yutang natawhan sa iyang kapikas   busa maoy hinungdan nga iya kining gihatagan og gahin alang sa mga proyekto sa panginabuhi, inprastraktura, pamatigayon, ug uban pa nga makabatang alang sa kauswagan sa panginabuhi sa katawhan sa   Tabogon.

Gipasabot ni Alcover nga naglisud siya paghatag og proyekto sa maong lungsod   ubos sa pagdumala niining kasamtangang administrasyon tungod kay balibaran man ni Mayor Eboy Dungog nga kaalyado ni Bogo City Mayor Junnie Martinez.

Busa mibati og kaluoy si Alcover sa mga molupyo sa Tabogon tungod kay di ra ba alang unta sa kaayohan ni Mayor Dungog ang mga proyekto nga iya untang ibubo sa maong lungsod kundi alang sa mga katawhan sa maong lugar.

Dugang ni Alcover nga ang iyang anak molansar ubos sa Lakas CMD human kini itudlo ni Senador Ramon Bong Revilla isip district chairman sa maong partido sa maong lugar. (/WC) (BANAT NEWS)