Gubat batok dengue gilusad sa Minglanilla

CEBU, Philippines - Ang kagamhanan sa Minglanilla uban sa Rotary Club Minglanilla uban sa ayuda sa grupo sa mga negosyante   milusad kagahapon sa buntag og kampanya batok sa dengue.

Si Konsehal Robert John “Jojo” Selma, chairman sa komitiba sa panglawas mibutyag nga naalarma sila human nga ang Minglanilla nahimong top one nga munisipalidad nga adunay taas nga kaso sa dengue base sa ulahing statistic.

Ang Minglanilla gilangkuban sa 19 ka mga barangay ug ang barangay Tulay ug Ward III Poblacion gihinganlan nga maoy adunay labing taas sa kaso sa dengue nga mikabat   og kapin sa 50, ug usa ang patay gikan sa buwan sa Enero hangtud sa Agosto niining tuiga.

Si Selma nagkanayon nga dugay na silang nagpahigayon og kampanya batok sa dengue sa ilang lungsod apan nasubo sila tungod kay kasagaran sa mga residente menos og pagpakabana.

Apan bisan pa niini wala sila mawagtangi sa paglaom ug padayon gihapon sila sa ilang kampanya.

Samtang si Doktor Wayben Briones kinsa sakop sa Rotary Club mibutyag nga base sa talaan sa Regional Epidemiology & Surveillance Unit (RESU) gikan sa buwan sa Enero hangtud sa Septiyembre 21 niining tuiga mikabat sa 345 ang natala nga kaso sa dengue sa maong lungsod apan wala’y natalang namatay.

Matud ni Briones nga ang pakigbatok sa dengue obligasyon sa tanan ug ang komunidad adunay dakong papel niini.

Matud usab niya nga bisan og aduna sila’y daghang larvicidal apan kung wala’y mga volunteer wala’y mahimo gihapon sa pagsumpo sa dengue. Kagahapon gibutyag ni Briones nga dili lang (“abate temephos)” o larvicidal ang makasumpo sa dengue kay puwede usab nga mogamit og asin nga ibutang sa tubig nga nagpundo o tubig sa dagat, hinugas nga tubig nga adunay sabon ug used oil nga makapatay usab sa larva.

 Gipasabot ni Briones nga ang abate usa kini ka klase sa kemikal nga makapatay sa lamok apan dili makadaot sa tawo ug mananap ug kalikopan.

Ang epekto niini sa pagpatay sa lamok gikan sa duha ngadto sa upat ka buwan kung dili lang maanod.

Ang presidente sa Rotary Club Minglanilla nga si Filomena Selma Cañedo nagkanayon nga mga alas 7:30 kagahapon gilusad nila ang caravan   nga kauban usab nila ang mga barangay health worker.

Ang maong caravan nagsugod sa Plaza Maria atubangan sa Immaculate Heart of Mary Shrine ug mipaingon ngadto sa national highway sa barangay Linao-Lipata ug mibalik paingon ngadto sa habagatang bahin hangtud sa barangay Tunghaan.

Ang grupo nangita sa mga lim-aw nga puweding itlogan sa lamok nga dengue ug mikabat sa 230 ang nasuta nilang breeding area sa mga lamok sa 19 ka barangay.

Ang maong mga breeding area gipamutangan nila og abate. Lima ka barangay ang nasuta nga adunay mga breeding area sa lamok nga mao ang Tungkod , nga may 71 ka breeding area, Upper Lipata, 36, Pakigne, 16, Lower Lipata, 15 ug Tunghaan, 14.

Siyam ka kilo sa abate ang gibubo sa maong mga itloganan sa lamok nga gitakdang mo-epekto ngadto sa usa ka ektarya nga gilapdon sa lugar.

Si Samsam Gullas apo ni Kongresista Gullas kinsa mokandidato sa pagka-kongresista sa unang distrito misaad nga motabang siya sa maong proyekto sa Minglanilla ug mangayo siya og pundo niini sa iyang apohan.

Matud ni Samsam nga kung mapili siya sa umaabot nga eleksiyon ang Minglanilla maoy himuon niyang pilot area sa operasyon sa pakigbatok sa dengue.  (BANAT NEWS)