Nag-ilog sa uyab usa giluba

CEBU, Philippines - Naangol ang usa ka bayong-bayong   human dunggaba sa laing batan-on   nga iyang silingan kay nag-ilog sa uyab didto sa sitio Langob, barangay Poblacion, dakbayan sa Lapulapu sa miaging gabii.

Ang biktima mao si Mark Bryan, 17, nga taga sitio Locata, barangay Looc sa maong dakbayan ug ang suspetsado mao ang nailhan lang sa ngalang John, 17, nga silingan sa biktima.

Si PO2 John Carlo Jocotan sa homicide section sa kapolisan sa maong dakbayan nga nahinabi sa Banat News miingon nga usa sa hinungdan sa pagpanunggab mao ang pangabubho sanglit kay nahimong uyab sa biktima ang 15-anyos nga dalagita nga kanhi   uyab usab sa suspetsado.

Dihang nagkaabot ang duha, gisukmatan sa suspetsado ang biktima nga siya maoy hinungdan   nga nakigbuwag kaniya ang iyang kanhi hinigugma, nagsugod ang ilang lalis nga misangko sa ilang pagsinumbagay. Dugang pa ni PO2 Jocotan nga dihang   nasarasay ang biktima nga naigo sa kumo sa suspetsado gihansakan dayon kini sa kutsilyo sa makadaghang higayon.

Ang biktima nga nakabaton og samad dinunggaban sa iyang liog, bukton, ug uban pang bahin sa lawas dali nga gihatod ngadto sa LapuLapu City Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo.

Si PO2 Jocotan miingon nga nadakpan hinuon nila ang suspetsado ug temporaryo nilang gipriso apan gitakda nga ilang itugyan kini ngadto sa City Social Welfare Office. (BANAT NEWS)