Mag-uuma giluba patay sa silingan

CEBU, Philippines - Namatay ang usa ka mag-uuma human kini dunggaba sa iyang silingan sa Barangay Caliriohan, lungsod sa Dalaguete niadtong Sabado sa gabii.

Wala na makaabot nga buhi   sa Julio Cardinal Rosales Memorial Hospital si Jury Gamboa, 25, gumikan sa samad dinunggaban sa iyang tiyan.

Ang suspetsado nga   si Jonathan Flores, 30, kinsa silingan sa biktima   giingon nga unang gisumbag sa biktima.

Matud pa sa kapolisan nga si Flores didto niadtong higayona sulod sa peryahan nagtan-aw og drop ball game dihang kalit nga miabot si Gamboa nga gituohang nakainom og ilimnong makahubog. Giingong gikomprotasi niini si Flores ug iya pa kining gisumbag.

Si Flores   nga wala mosukol og sinumbagay mipauli sa ilang balay ug mikuha sa   iyang pinuti ug sa iyang pagbalik naabtan pa niya si Gamboa sa peryahan.

Diha-diha gihansakan dayon ni Flores ang tiyan niini ug wala na makahigayon pa sa pagpanumbag kay nahagba kini sa yuta   ug nakabsan sa kinabuhi.

Si Flores   nasikop dayon sa kapolisan ug nagtingkagol na karon sa prisohan samtang gipaaabot ang tukmang kaso nga isang-at batok kaniya.  (BANAT NEWS)