Ulitawo naghikog gumikan sa TB ug nerbyos

CEBU, Philippines - Gumikan sa kadaghan og sakit nga gihambin, ang usa ka ulitawong guwang   nagpugos sa pagkutlo sa iyang kinabuhi pinaagi sa pagbitay sa sanga sa mangga duol sa iyang balay sa sitio Humbar, barangay Poblacion, sa lungsod sa Liloan kagahapon sa alas 4:00 sa kaadlawon.

Ang nagpakamatay mao si Danilo Tolo, 54, ulitawo, nga    nagpuyo sa maong lugar.

Si SPO2 Recardo Enriquez sa Liloan Police   Station mibutyag   sa Banat News   nga nadiskobrehan ang patay’ng lawas ni Tolo sa iyang maguwang nga si   Alfredo Tolo.

Matud pa ni SPO2 Enriquez nga puwerting kurata ni Alfredo dihang nagbitay niyang manghod sa sanga sa mangga.Ang mga polis nga mirespondi nakahipos og cell phone nga adunay mensahe nga nagkanayon nga “Pasayloa ko ninyo kay duna koy sakit, dili na naku kaya ang sakit, nervous”,tipik sa maong mensahe.

Dugang nahipos sa kapolisan gikan sa mga kabanay nga si Tolo daan nang nagsigi og panulti sa iyang mga kabanay nga magpakamatay siya tungod sa iyang sakit nga tuberculoses ug nervous breakdown. (BANAT NEWS)