P1.2M danyos sa DPWH fire

CEBU, Philippines - Temporaryo una nga mookupar sa bakanteng lawak sa atbang nga buhatan sa Department of Public Works and Highways (DPWH 7) ang 5th Engineering District sa maong ahensya sa S. Osmeña St. sa eskina V. Sotto Street (Pier 3 area) aron dili maputol ang ilang mga operasyon.

Kini maoy gibutyag sa usa sa mga district engineer sa maong ahensya nga si Engr. Yusoph Rasuman human nasunog ang ilang buhatan niadtong Biyernes sa gabii.

Samtang gipadayag ni Rasuman nga balik na pud sa agi ang pagama nila og dokumento sanglit wala sila’y digital file niini.

Nasayran nga gawas sa mga 24 ka mga kompyuter, furniture ug uban pa nila nga mga importanteng gamit nalakip pagkaugdaw ang mga importante nilang dokumento sa ilang mga programa, kasamtangang proyekto ug mga gipangplanong proyekto.

Sumala pa nga nalakip sa nasunog nga nahimutang sa Bids and Awards Committees (BAC) section mao ang dokumento alang sa road asphalting project sa Liloan nga gikatakdang i-bidding sa mosunod nga mga adlaw. Base sa report sa dyLA radio ang fire investigator sa maong sunog nga si FO3 Lowel Opolenticima moabot ngadto sa P1.2 milyon ang danyos sa sunog sa maong buhatan.

Milungtad og 20-minutos una pa hingpit nga nakontrolar ang maong sunog nga gikatahong unang nagsugod sa ikaduhang andana sa establisamento.

Base sa unang imbestigasyon gituohang faulty electrical wirings ang hinungdan sa sunog sa kisame nga karaan na kaayo ug baga na ang aso dihang nabantayan sa gwardiya kinsa mitawag na lang dayon sa kabomberohan.Ang building sa DPWH nga nasunog natukod niadto pang dekada 70 ug kini ginama sa kahoy maong dali ra kaayong naugdaw. (/EIM) (BANAT NEWS)