CEBU, Philippines - Gisalikway ni One Cebu Party gubernatorial candidate Cebu Third District Congressman Pablo John “PJ” Garcia ang nanggawas nga report nga dili na mahinayon ang ilang tandem ni kanhi Danao City Vice Mayor Boboy Durano IV sa 2013 elections.
Matud pa ni Garcia nga walay kamatuoran ang maong balita ug nagdudang gipalakaw lang kini karon sa ilang kaatbang sa politika.
Si Garcia miingon nga wala sila maapektohi niini sanglit nasayod sila nga lain na usab kini lansis gikan sa laing partido. Nangangkon si Garcia nga nabatyagan na sa ilang mga kaatbang nga lig-on ang panagpares nga Garcia-Durano maong dunay mga nanggawas nga susamang report.
Apan giklaro niini nga walay kausaban ug magpadayon ang ilang panagpares ni Durano hangtud na sa piniliay sa sunod tuig.
Gipahibawo usab ni Garcia nga ila nang gi-diskutir pag-ayo ang ituboy sa pagka- board members ubos sa ilang partido ug gisiguro niyang ligdong sila nga mga tawo.
Gipasabot ni Garcia nga dili sila gusto nga masubli ang nahitabo sa mga provincial board members sa ubang distrito nga gitabangan sa gobernador nga makadaug, gihatagan pa gani og suporta pinaagi sa mga mihuras ug proyekto apan mibiya sa partido nga wala gani mananghid.
Gipasalig sa partido nga plantsado na unya sa pag-file sa ilang kandidatura ang ilang partido nga ilang himuon sa katapusang adlaw sa filing of certificates of candidacies sa Oktobre 5 diha sa Commission on Elections. (/EIM) (BANAT NEWS)