Tagbalay gilipat mga alahas gisakiyo

CEBU, Philippines - Mokantidad sa P100,000 ang nawalang kabtangan sa usa ka babaye human gisulod ang balay sa wala mailhing tawo niadtong Huwebes sa udto sa Barangay North Poblacion, San Fernando. Si Elena Booc, giingong didto sa kapilya sa ilang lugar dihang gisulod ang iyang balay sa kawatan ug gikuha ang iyang mga alahas ug laptop.

Matud ni Insp. Crisanto Abella, deputy chief sa San Fernando Police Station dunay nakakita nga usa sa duha ka kawatang gituohang ‘lookout’ samtang ang usa maoy misulod sa balay agi sa likod nga pultahan.

“Igo ra siya gibantayan, paglakaw niya gisunod ra pud siya kay nalimtan man og sirado ang mga pultahan,” matud pa ni Abella kinsa mipahimangno sa publiko bahin niining matang sa modus sa kawatan. (BANAT NEWS)