Gwen namulong sa anibersaryo sa China

CEBU, Philippines - Gitambongan ni Governor Gwendolyn Garcia ang ika- 63 nga founding anniversary sa Peoples Republic Of China.

Ang gobernador sa Sugbo maoy pinasidunggang dinapit isip mamumulong sa maong kalihukan nga gipahigayon sa Marco Polo Hotel nga gitambungan sa Chinese Community dinhi sa Sugbo.

Sa pagpamulong   sa gobernador iyang gipadangat ang  iyang pasalamat   tungod sa dakong kauswagan   nga nakab-ot   sa Sugbo gumikan sa pagdominar sa mga negosyanteng Insek dinhi ug maingon man sa tibuok nasud.

Maoy hinungdan nga ang pagpabilin sa maayong relasyon sa China ug Pilipinas gikinahanglan kaayo aron labi pang molipang ang kalamboan sa Pilipinas ilabi na sa lalawigan sa Sugbo, matud pa sa gobernador.

Sa samang higayon mapasalamaton usab kaayo si Chinese Consul General Zhang Weiguo sa tanang mitambong sa ilang ika -63 nga founding anniversary sa Peoples Republic of China ug mipaabot sa kahimtang sa nahisgutang nasud human kini maugmad.

Gipasalig usab niya nga kanunay makigtambayayong ang nasud nga China sa Pilipinas alang sa kauswagan niini sa natad sa panginabuhi ug labaw sa tanan sa kamalinawon sa relasyon sa duha ka nasud.( /WC) (BANAT NEWS)