Miligis sa polis gikiha na

 CEBU, Philippines -  Gipasakaan na og kaso nga reckless imprudence resulting to homicide sa kapolisan sa Traffic Division sa Mandaue City Police Office (MCPO) ang driver sa Kaohsiung Bus nga nakaligis patay kang SPO1 Edison Gumpay, 42 , nga taga Bays Water Subdivision sa barangay Maribago sa dakbayan sa Lapulapu.

Si PO2 Dante Flores sa Traffic Division sa MCPO miingon nga si Bernalito Pahingahug, 33 , nga taga barangay Mambaling, sa dakbayan sa Sugbo maoy  driver sa Kaohsiung bus nga gipanag-iya sa kagamhanan sa dakbayan sa Sugbo, nga nagdagan  sa dalan M.C. Briones  sa barangay Guizo nga miligis sa biktima nga nagsakay  sa iyang  motorsiklo.

Samtang si Pahingahug nga nagtingkagol na karon  sa prisohan nanghimakak nga gituyo niya pagligis  si SPO1 Gumpay apan giangkon niini nga iyang nabati ang kusog kaayong lagapak sa luyo sa iyang bus nga nakaaghat niya sa paghunong ug misusi niini ug maoy  iyang nakita  nga nagbuy-od sa karsada si SPO1 Gumpay tupad sa motorsiklo niini

Sa nasayran nga si SPO1 Gumpay nga nadistino usab sa Traffic Division sa Cebu City Police Office (CCPO)  pauli na  unta  kini dihang nahiagom sa hinanali  niyang kamatayon niadtong  Huwebes. (Romeo T.  Limpangog/WC)

 Nagtungha sa day care may insurance

Ni Sanden Anadia

 Si Mayor Michael Rama miluwat  og executive order  sa pagtunol og “life and accident insurance” alang sa  tanang tinun-an sa day care center  sa 80 ka mga barangay sa dakbayan sa Sugbo.

Nasayran nga dunay mga day care center sa nagkadaiyang barangay nga gidumala sa Departmant of Social Welfare and Services (DSWS) ug mao kini ang makabenepisyo sa maong programa.

Ang maong executive order gitawag ni Rama  nga “Preschool Children Life Protection Program Order” nga gitumong   nga kahatagan og ayuda kadtong mga bata nga magmasakit.

Ang pundo niini kuhaon sa nagpadayon nga City Hospitalization and Medicine Program (CHAMP).

Nagkanayon si Rama nga dako  kaayo kini og ikatabang  ilabi na nga kasagaran sa mga bata  dali   kaayo nga mataptan  og sakit.

Dugang pa sa mayor nga kusog usab kaayo karon ang sakit  nga pneumonia, dengue ug uban pa busa ang kagamhanan sa  Sugbo mipaseguro na  sa kabataan nga anaa  sa day care  center. Matud pa niya nga usa sa responsibilidad sa usa ka local government unit ang pag-atiman sa kabataan ug usa na niini ang pagtunol og programa nga magprotehir sa ilang kalawasan.  (BANAT NEWS)