Konseho ginganla'g anti-poor

 CEBU, Philippines - Gihinganlan sa pangulo sa Nasudnong Katawhang Kabos (Nakabos)  sa Barangay Luz, sa dakbayan  sa Sugbo ang konseho sa dakbayan sa Sugbo nga “anti-poor” gumikan sa pagbabag niini sa proposal sa Division for the Welfare of the Urban Poor (DWUP) ug  Mayor Michael Rama nga paliton ang luna nga kasamtangang gipuy-an sa 32 ka pamilya.

Matud pa ni  Evangeline Abejo, lider sa Nakabos nga ang tinguha nila  mao nga dili lang unta mahinayon ang gikatakdang demolisyon sa mga pamilya nga nagpuyo sa tulo ka mga sitio sa maong barangay nga naglangkob sa Langka, sitio Mabuhay ug sitio Lubi.

Matud pa ni Abejo nga may gitakda nga hearing karong adlawa ug masuta   nila kung madayon ba o dili ang demolisyon.

Nagkanayon si Abejo nga kasagaran sa mga molupyo sa maong dapit  naguol na pag-ayo ug ang uban niini  wala na’y tarong nga tulog  panahon  sa kagabhion.

Samtang ang pangulo sa DWUP nga si Atty. Collin Rosell misaysay nga tabanganan gyud kaayo ang 32 ka pamilya ug dako kaayo  nilang  kahasol sa higayon nga  demolison sila busa labing maayo nga angay unta nga paliton na lang gyud kini sa siyudad. Sa maong paagi, ang maong mga tawo mao na’y mobayad o modata-data ngadto sa kagamhanan. Ang konseho misugyot kang Rama nga mas maayo nga tagaan og relocation site ang maong mga pamilya ug hatagan og financial assistance.

Midepensa usab si Konsehal Alvin Dizon sa paghulagway kanila isip anti-poor ug misaysay kini nga daghan sila og nabuhat nga mga programa alang sa kabos sama sa housing program ug   ang paggama og housing trust fund. (BANAT NEWS)