CEBU, Philippines - Hayan nga mag-atubang og kaso sa Ombudsman ang kapitan sa barangay Mantuyong sa dakbayan sa Mandaue tungod sa pagpanghagit og away niini sa mga sakop sa demolition team sa dakbayan nga nangguba sa ilegal nga tangkal sa baboy sa karaang ihawan sa sitio Asinan kagahapon sa buntag.
Kini ang gipadayag ni Buddy Ybanez sa legal office sa maong dakbayan nga nahinabi sa mga tigbalita sa press conference nga gipahigayon kagahapon.
Matud pa ni Ybanez nga nahunong ang pagpangguba sa mga sakop sa demolition sa nahibilin nga mga tangkal sa baboy sa maong lugar dihang gihagit og away ni Kapitan Antonino “Tony” Maquilan si Edmund Maboloc nga maoy nangulo sa mga sakop sa demolition team sa maong dakbayan nga mitiwas sa pagguba sa nahibilin nga mga tangkal sa baboy.
Dugang pa ni Ybanez nga adunay kuyog si Kapitan Maquilan nga mga tawo nga maoy nakaaghat kang Maboloc sa pagbiya na lang sa maong dapit sa paglikay nga mahitabo ang kagubot.
Samtang si Kapitan Maquilan nga nahinabi sa Banat News mipasabot nga nasuko siya dihang iyang nakita nga gitiwas sa pagguba ang iyang tangkal nga unta mihangyo na man siya nga iyang pangunayan ang pagguba niini. Gitataw niya nga adunay laing tangkal sa baboy nga angayan unta nga maoy gub-on apan tungod sa hangyo sa tag-iya, wala ipadayon sa pagguba niini. Giklaro ni Kapitan Maquilan nga dili siya supak nga gipangguba ang ilang mga tangkal sa baboy sa maong lugar tungod kay gikinahanglan man usab nga malimpiyo ang maong dapit .
Ang gihangyo lamang nila nga hatagan sila og lugyaw hangtod sa Enero sa sunod tuig kay gusto unta nilang makapahimus sa kusog nga pinalitay og baboy sa buwan sa Disyembre kay panahon sa Pasko
Si Dr. Daisy Penetrante nga maoy City Veterinarian sa maong dakbayan nga nahinabi sa Banat News miingon nga hingpit na nilang naandam ang mga tangkal sa baboy sa ihawan sa barangay Labogon nga maoy kabalhinan sa 15 ka mga nanag-iya og tangkal sa barangay Mantuyong nga gipangguba sa mga sakop sa demolition team
Apan nagdumili sila si Kapitan Maquilan sa pagbalhin ngadto kay gawas nga layo kuyaw pa gayod alang kanila ug sa ilang mga kustomer tungod kay daghan na ang biktima sa pagpanulis sa maong dapit, matud pa niya. (BANAT NEWS)