Granada giapil og patimbang

 CEBU, Philippines - Pwerting hadloka sa usa ka scrap buyer dihang  nakapalit og  buhing  granada  nga gisagol  sa gitimbang  niya  nga  mga puthaw  didto sa Poblacion lungsod sa Carmen niadtong Miyerkules  sa buntag. Si Nelson Capuyan, 56, minyo, sa syudad  sa Danao, kinsa usa ka scrap buyer  mibutyag sa kapolisan  nga  wala  na  nila hiilhi  ang  nagpatimbang og  mga puthaw  kansang  sako nga  gisudlan  gipaubanan  og  granada.

Si SPO2 Gerry Galon sa Carmen Police Station mibutyag sa Banat News subay sa ilang imbistigasyon  ni Capuyan ilang nasuta nga  mikurog kini sa kalisang dihang human maablihi ang  usa ka sako nga bag-o pa nilang  tinimbang, kalit lang  nahabwa ang granada nga murag cacao  ug  miligid sa yuta diin  iyabo ang  sako.

Matud  sa kapolisan nga  nawala ang kapoy  ni Capuyan  sa  kakuyaw ug gihatud dayon  niini ngadto sa ilang buhatan   ang maong granada aron  kalikayan ang  disgrasya.

Matud ni SPO2 Galon   nga wala pay taya ang maong granada ug mahimo pa kining mobuto bisan unsang orasa tungod kay aduna pay pin.  (BANAT NEWS)