Drainage system gituki sa MCDCB

 CEBU, Philippines - Ang kahimtang sa drainage system dinhi sa Metro Cebu Area maoy nahimong sentro  sa gituki  sa  mga  opisyal  sa Metro Cebu Development Coordinating Board (MCDCB) didto  sa Kapitolyo  sa miaging  buntag.

Ang maong  tigom gipangunahan  ni Governor Gwendolyn Garcia   ug  gitambongan  usab  sa 13 ka mga local government  unit (LGU) sa Metro Cebu ug   mga  sakop  sa nagkadaiyang pribadong sector.

Ilang gihatagan  og gibug-aton  ang  pagsulbad  sa  suliran bahin  sa baha  nga  masinatian  kanunay  sa  mga dakbayan sa Sugbo; Mandaue; Talisay ug lungsod sa Consolacion.

Base  sa rekord nasuta  nga  sa 1983, 18  ra  ka  dapit  ang  nalista  nga  maoy bahaanan  sa Metro  Cebu  apan ang nahisgutang flood prone areas  nahimong 127    pag-abot  sa tuig 2006  ug  sa pagkakaron,  wala  pa mahingpit  ang  ilang  listahan  kun  pilay  nahidugang  sa 127.

Sumala pa sa report sa chairman sa Research Program and Organizational Development Committee on Infrastructure and Utilities sa MCDCB nga si Engr. Jun Sanchez   nasayran  nga ang 127 ka mga flood prone areas   mao  gayud  ang  sentrong bahaanan  inig-bundak   sa uwan.  Gibutyag usab ni Engr. Sanchez nga ang hinungdan sa maong mga pagbaha mao ang nagkagamay na ang mga sapa; kanal ug  estero gumikan sa illegal nga mga nanimuyo kansang  balay  anaa  ipanarok  sa daplin sa maong kasapaan.

Base usab sa maong pagtuon, si Engr. Sanchez mirekomendar nga balhinon ang tanang mga nagpuyo sa daplin sa sapa, kanal ug estero nga nakaali sa agianan  sa tubig ug pagpatuman dayon sa RR3 kon “Restoration of River and 3-Easement” Program sa mga  dapit  nga  sakop sa Metro Cebu area. Nasayran  usab   base   sa maong report nga adunay gibana-banang P120 milyones  ngadto sa P150 milyones    ang  giandam  nga  budget  niini aron ilang kasugdan ang paglimpyo  sa  mga  kabalayan ug pagtukod  og   tukmang  drainage plan  dinhi sa Metro Cebu area.

Human mabutyag ang kahimtang sa mga kanal dinhi sa Sugbo giduso mismo ni Mayor Teresa Aligado sa Consolacion ang usa ka resolution ngadto sa MCDCB Board nga  nag-awhag sa presidente sa Pilipinas nga gahinan og tukmang  pundo  ang  pagpaayo  sa mga  imbornal dinhi sa Metro Cebu . 

Ang MCDCB gilangkoban  sa mga syudad sa Cebu; Carcar; Naga; Talisay; Mandaue; Lapulapu; Danao; mga lungsod sa Compostela; Liloan; Consolacion; Cordova; Minglanilla, San Fernando ug ingon man ang mga nasudnong buhatan  sa nasudnong  kagamhanan ug pribadong sector.  (BANAT NEWS)