Alay Lakad walk for a cause ilusad

 CEBU, Philippines - Ang Alay Lakad Cebu Foundation Incorporated, (Alay Lakad) nangandam na  alang sa  pagpahigayon sa ilang tinuig nga kasaulogan ug molusad  sa proyekto nga Alay Lakad Cebu Walk For A Cause  karong umaabot Septembre 30 ning tuiga,nga mipadasig  sa publiko  sa pagsalmot  niini.

Kining maong proyekto  nga ‘walk for a cause’ gitumong aron makahipos  ang  maong  foundation  og  pundo alang  sa  mga  eskolar nga  mga tinun-an nga  gigastohan niini.

Kini  tungod  kay  kutob  sa  mosalmot  niini pangayoan  man  og  amot  alang  sa gitinguha  sa maong  pundok  tungod  kay  dili  lamang    kasamtangang  estudyante  nga nagtungha   ang  ilang gastohan  kundi bisan  kadtong  mga out  of school  youth.

Sumala pa ni Alay Lakad Cebu Executive Chairman Steve Norman Tan atol sa gihimong special Kapihan sa PIA kagahapon didto mismo sa buhatan sa PIA nga gitarget sa maong pundasyon nga makabaton og 50,000 hangtod 60,000 ka mga mosalmot sa lakaw.

Dugang pa niya nga ang mga donasyon nga ihatag unya sa mga mosalmot direktang gamiton nila sa pagpadayon sa pag-implementar sa ilang mga programa nga naglangkob sa High school Educational Assistance, College Scholarship, Skills Training, Livelihood Training, Adopt a Scholar Program ug usab Drug Awareness Seminar.

Gawas  niini aduna usab siyay giplanohan nga ipatuman nga programa sa umaabot sama sa Piso Mo Kaugmaon Ko Donation Drive, Basura Mo Para sa Kaugmaon Ko Waste recycling drive ug usab Livelihood Pangnegosyo Program.

Gipasabot ni Tan nga sa programang Basura Mo Para sa Kaugmaon ko Waste recycling drive, kadtong interesadong mo-donate sa ilang basura nga mamahimo pang magamit sama sa papel, plastik, botelya ug uban pa, ila kining dawaton ngadto sa ilang opisina apan aron dili na gayud maglisod pa sa paghatod ang mga mo-donate, gisugyot  niya nga patawagon lamang ngadto sa ilang opisina aron adto na lang sa mismong balay sa mo-donate moadto ang buyer.

Matud  pa ni Tan nga  tseke  ang  iluwat  sa  buyer  ngadto sa mohatag  sa maong  donasyon  ug  ang  maong  tseke mao nay  dawaton  sa buhatan  sa Alay Lakad.

Ang Alay Lakad nagserbisyo na sulod sa 38 ka tuig ug nakatabang na kini og labaw sa 3,000 ka mga benepisyaryo gikan sa tuig 1974 hangtod sa tuig 2008 ug  95 ka mga benepisyaryo gikan sa tuig 2009 hangtud karong tuiga.

Gawas niini dul-an usab sa 2,800 ka mga molupyo ang nakapahimus sa ilang reflex ug massage nga serbisyo gikan sa ilang gibansay-bansay nga mga therapist pinaagi sa home service, fun run, Grand Halad sa kapamilya, CCCI Spa ug usab Wellness affair.

Ang assembly area sa Walk for a Cause adto ipahigayon sa City Central School sa alas 5:00 sa buntag ug pagka- alas 6:00 niana magsugod gilayon ang lakaw padulong ngadto sa Plaza Sugbo atubangan sa City Hall diin ipahigayon ang programa.

Gipanghinaot ni Tan nga unta ang tanang may malumong kasing-kasing mosalmot niining maong kalihokan ug kadtong mga nakasalmot na sa nangaging Alay Lakad Cebu Walk for a Cause giawhag usab nga mosalmot pagbalik.

Kadtong mga interesadong mo-donate pa nga ipaagi lamang sa ilang opisina sama sa ahensya sa goberno mamahimong motawag sa opisina sa Alay Lakad Cebu sa telephone number nga 4191469 ug sa cellphone number nga 09067627778 ug pangitaon lamang si Steve Norman Tan ang Alay lakad Cebu Executive Chairman

Samtang  ang Talisay City Alay Lakad Foundation Inc. (ALFI)  kauban  usab  sa  maong kalihokan  diin  ang  tanang  mosalmot  sa maong  dakbayan  adto mag-abot  sa  Gaisano Fiesta Mall sa Tabunok sa alas 4:30 sa kaadlawon karong  Domingo.

Inigka-alas 5:00  sa buntag  magsugod  na  ang  lakaw   paingon  ngadto sa Talisay City Central  School  diin  ipahigayon  ang  usa ka programa.

Ang taga  Talisay  mosalmot  sa lakaw nga hamtong mo-donate  og P20 matag  usa, college student, P10; secondary ug elementary student, P5.

Ang mahipos  nga  pundo gikan  niining maong  kalihokan  gitakdang  maoy  igasto  sa 536 ka  mga college  student.

May pasidungog  usab  ang mga grupo  nga mosalmot  nga dagko og amot, most colorful, liveliest group, oldest ug youngest participant.

Ang  mga grupo sa  mosalmot sa parade maglangkob  sa Division A  nga mao  ang  mga  opisyal sa dakbayan, barangay  ug  mga  opisyal  sa Sangguniang Kabataan.

Ang Division B  langkuban  sa public elementary ug secondary school, samtang  ang Division C langkoban  sa mga  private pre-elementary ug secondary school  ug  ang Division D, langkoban  sa  NGO, religious sector ug business sector.  (/WC) (BANAT NEWS)