Nagpailang mga polis mangingilad diay

CEBU, Philippines - Tulo ka mga tawong pulos nagpailang sakop sa kapolisan ang nadakpan tungod sa pagpangilad sa dakbayan sa Talisay ug dakbayan sa Danao sa milabay’ng adlaw.

Sa siyudad sa Danao, usa ka negosyante og manok ang gisikop human gireklamo sa iyang kasosyo tungod sa kwarta, apan gidakop human nagpaila kini sakop sa Philippine National Police ug nangranggo Superintendent.

Ang nagpailang polis mao si Remil Giamal kinsa nangangkong kabahin sa Philippine Military Academy Class 83.

Si Supt. Ricky Delilis, ang hepe sa kapolisan sa syudad sa Danao mibutyag sa mga tigbalita nga nagkahimamat na sila ni Giamal ug nagpaila kining opisyal sa PNP kaniadto.

“I even saluted him, he is my senior, I gave him respect because he belongs to class 83 and I belong to class 96,” matud pa ni Delilis. Apan tungod sa reklamo sa kaliwat sa opisyal sa kapolisan sa Mandaue nga si Supt. Jason Capoy nga si Maria Fe bahin sa kwarta gisusi nila ang background ni Giamal.

Nasuta gikan sa Camp Crame nga walay Remil Giamal sa listahan sa mga police officials. Dihang kini gisikop daghan kining mga ngalan sa mga labaw sa kapolisan sa kaulohan ang iyang gipanganlan ug miangkon gikan sa Camp Crame ang iyang PNP ID nga gipakita.

Si Sr. Supt. Patrocinio Comendador ang pangulo sa provincial police office naalarma sa maong pagpangilad tungod kay seryosong ‘breach of security’ ang nahitabo sa ilang organisasyon ug makahatag kini og bati nga imahe sa kapolisan.

Sa laing hitabo, usa ka 51-anyos nga ginang ang midangop sa Talisay City Police Station kay nailad sa duha ka tawong nagpailang polis nga nahitabo niadtong Septiyembre 19, 21 ug 22 niining tuiga. Ang biktima mao si Jorita Donlag, taga Miami Homes, barangay San Isidro sa nahisgutang dakbayan mireklamo batok nila ni Ferdinand Esturas ug Ann Fe Villanueva, pulos edaran ug residente sa sitio Sambagan, Tabunok sa maong siyudad.

Sa imbestigasyon sa kapolisan nga nianang adlawa mianha sa tindahan sa biktima si Esturias ug nagpailang siya si SPO4 Alam Tibo uban ni Villanueva ug mitanyag og katabang, tungod kay interesado siya mihatag si Donlag og P550 aron ipamelete sa katabang padulong sa Talisay. Pagsunod duha ka adlaw nagbalikbalik si Villanueva pagpangayo og kwarta apan wala gyuy katabang nga miabot hinungdan nga gireklamo na kini ngadto sa kapolisan. (BANAT NEWS)