COC filing mahinayon gyud

CEBU, Philippines - Mahinayon gyud ang filing sa certificates of candidacy sa petsang gitakda sa sunod semana sumala pa sa pangulo sa Commission on Elections.

Sa report sa GMA News Online, si Elections chair Sixto Brillantes Jr. nagkanayon wala nila tuguti ang awhag ni Atty. Romulo Macalintal nga isibog ang filing period gikan sa Oktubre 1-5 ngadto na sa Nobiyembre 15 kutob 20 aron makapagawas ang Comelec sa listahan sa mga kandidato karong Enero.

Sumala pa ni Macalintal nga lima na ka bulan dihang ilang gipadala ang resolusyon nga nagpahibalo bahin sa petsa sa filing sa COCs ug walay mireklamo niini ug nangayo nga lugwayan o isibog.

Matud pa ni Macalintal malangay pa sila og dugang duha ka semana kung ilang isibog ang filing sa COCs tungod sa pagpanglimpyo sa talaan sa mga kandidato niadtong mga nuisance candidates, diskwalipikado ug uban pa.

Giingong adunay 18,022 ka elective posts ang bakante nga maoy ilogan sa mga kandidato karong Mayo 2013 midterm elections, naglakip niini ang 12 ka senador, 229 ka kongresista, 172 ka bag-ong party-list groups dugang sa daan nang 113 ka grupo nga midaog niadtong 2010 elections. (BANAT NEWS)