DUMAGUETE CITY, Philippines – Gibanabang 25 ka pamilya ang gipabiya sa ilang mga panimalay sa mga daplin sa Siaton River ug Canaway River sa Siaton, Negros Oriental ug gipabalhin sa mas luwas nga dapit niadtong Lunes sa gabii tungod sa flashfloods bunga sa walay puas nga pagbunok sa ulan nga nakapalapaw sa maong mga suba.
Si Angelo Tiongson sa Provincial Disaster Risk Reduction and Management Council (PDRRMC) miingon nga mipatuo ang mga pamilya sa gihimong lakang sa mga awtoridad sa pagpabalhin kanila sa gymnasium ug mibalik lang sila pagkasunod adlaw human matino sa mga awtoridad nga luwas na ang ilang mga dapit. Ang Kapitolyo sa Negros Oriental pinaagi sa PDRRMC mipadala og mga food packs sa mga apektadong pamilya.
Sa laing bahin, napalgan ang patay’ng lawas sa 29-anyos nga si Reynaldo Saguban Adaya nga residente sa sitio Sto. Niño sa barangay San Pedro sa Sta. Catalina. Matud pa ni Insp. Rogelio Pacificar ang hepe sa kapolisan sa maong lungsod gianod sa baha samtang mitabok sa taytayan si Adaya. (BANAT NEWS)