Patak sa dugo maoy nakapasikop sa kawatan

CEBU, Philippines - Usa ka ex-convict ang nasikop sa mga sakop sa Special Weapons and Tactics (SWAT) human sa usa ka oras niining pagtago sa ilalom sa sakyanan pasado alas-12 sa tungang gabii diha sa dalan N. Bacalso barangay Mambaling ning dakbayan.

Ang suspetsado nailhan nga si Ernesto de Guzman, 31, kasamtangan nga nagpuyo sa barangay Ermita ug lumad kini nga molupyo sa Hilongos, Leyte. Sa pasiunang imbestigasyon sa kapolisan miresponde ang SWAT sa alarma sa pagpangawat diin ang kawatan giingong nagtago ra sa sulod sa panimalay sa gikawatan.

Giingong si de Guzman milungkab sa Cebu Massive Auto Parts ug dihang nasakpan daling mitago sa katupad nga Tengs Realty Dev. Corp. apartment nga gipanag-iya ni Lou Omang agi sa bintanang tuyo niyang gibuslotan.

Sa pagsiksik sa kapolisan sulod sa usa ka oras nasakpan kini ilawom sa sakyanan sa garahe.

Matud pa ni PO3 Alan Caumeran sa SWAT nga ang suspetsado mi-ambak pa dihang misuway sa pag-ikyas apan nabalian kini sa walang kamot ug maayong pagkagisi sa iyang tuong kumagko, ang dugo niya maoy ilang gisubay hangtud nga kini nakit-an ilawom sa sakyanan.

Dugang pa ni Caumeran nga ilang nasayran nga aduna diay kasong murder ang suspetsado sa Mindanao ug napriso kini sulod sa 16 ka tuig. Gipangita usab sa kapolisan ang giingong kalibre .45 pistola nga gidala sa suspek.

Ang suspek miingon nga naproblema siya sa kwarta sa ilang pamilya maong nahimo niya ang pagpangawat, apan mibutyag siya nga ang armas nga iyang gidala nga gipangita pa sa kapolisan iyang pinalit og P3 mil. (BANAT NEWS)