Tagbilaran City, Philippines—Gikompirmar ni Presidente Benigno Aquino III nga sa tuig 2016 may bag-o nang tugpahanan ang lalawigan sa Bohol nga mao na unya ang Panglao International Airport sa lungsod sa Panglao. Kini iyang gipasalig kagahapon sa iyang pagduaw sa dakbayan sa Tagbilaran nga nagkanayon nga ang maong tugpahanan sugdan pagtrabaho sa Nobiyembre 2013 ug mahuman sa dili pa siya manaog sa katungdanan sa tuig 2016.
Matud pa sa presidente nga ang maong tugpahanan gigahinan og P7.4 bilyones maoy mahimong ikaduhang tugpahanang internasyonal sa Central Visayas o rehiyon 7, ikaduha sa Mactan Cebu International Airport.
Si Aquino nga mipapanumpa sa dul-an 600 ka mga bag-ong opisyal sa Liberal Party sa sulod sa Bohol Cultural Center nagkanayon nga napanglantawan niya kung unsa kakusog unya ang paglambo sa turismo sa Central Visayas sa panahon nga mahuman ang bag-ong tugpahanan sa Panglao.
Kini tungod kay ang mga turista nga modiretso og tugpa sa Bohol sayon kaayong makatabok-tabok sa mga lalawigan sa Sugbo, Negros Oriental ug Siquijor.
Ang pamuno nasud nga miabot sa Tagbilaran sa alas 2:00 sa hapon misaksi usab sa pagpanghatag og awards sa mga most outstanding barangay officials atol sa labing unang Barangay Day Celebration sa maong lalawigan nga gipahigayon didto sa Bohol School of Wisdom Gymnasium .
Ang maong okasyon gitambongan sa mikabat og 7,000 ka mga opisyal gikan sa 1,109 ka barangay sa lalawigan sa Bohol. Matud pa sa Pamuno nasud nga karong nasuta niya ang kalig-on sa partido Liberal sa maong lalawigan, tanang kauswagan niini lakip na sa natad sa agrikultura, edukasyon, panglawas, panginabuhi, ug pangempleyo matagamtaman sa tanang mga Bol-anon ug ingon man sa mga molupyo sa rehiyon 7 ingon man sa tibuok nasud. (BANAT NEWS)