Politika sa Talisay mibokal na

CEBU, Philippines - Si Konsehal Romeo Villarante   sa dakbayan sa Talisay nga sakop sa kampo sa oposisyon mipasangil nga mibokal na gyud ang politika sa dakbayan sa Talisay tungod kay bisan unsa ka gamay sa resolusyon nga ilang ipasar sa oposisyon lisud   nga maaprobahan.

Ang maong pagmahay ni Villarante mitumaw human sa ilang sesyon dihang wala aprobahi ang resolusyon nga iyang gipalabang nga nagsuporta sa House Bill   No. 2742 ni Kongresista Julieta Cortuna. Ang maong bill ni Cortuna nagmando sa local government unit (LGU) sa paghimong sihag   sa tanang local budget ug galastohan nila, mga subasta   ug public hearing.

Si Villarante mibutyag sa mga tigbalita kagahapon   nga ang pagbabag sa administrasyon sa pagpasar sa maong resolusyon makita nga misamot na og kainit ang politika sa Talisay.

Si Villarante nagkanayon nga si Bise Mayor Alan Bucao maoy mipasiugda sa division of the house nga imbes dili unta angayan tungod kay walay motion gikan sa mga konsehal. Gipasabot ni Villarante nga ang bise mayor isip presiding officer neutral lang unta ug angay nga maggikan sa floor o mga konsehal ang ideya sa diskusyon kabahin sa resolusyon.

Si Bucao sa iyang bahin, mipasabot nga ang lihok ni Villarante nasabtan na nga buot niini ang division sa house.

Gani gipasabot kini nila ni Konsehal Rodi Cabigas ug Choy Aznar nga ang siyudad nag-practice na og transparency ug kung ipasar ang maong resolusyon malain unya og sabot sa publiko.

Matud ni Bucao nga dugay nang mibokal ang politika sa Talisay, “kanang magpagawas og statement nga wala pa mapasar ang resolusyon that is improper, di ba? 

Ang council mi-assigned nako og committee, unsaon man nako kung dili ko mo-file og resolution ug ordinances sa akong committee?

Dugang usab ni Bucao nga patas siya sa tanan ug gani ang ubang mga konsehal nga iyang kaalyado kasab-an pa niya kung aduna kini sipyat nga nahimo.  (BANAT NEWS)