CEBU, Philippines - Nabulit sa samad pinusilan ang usa ka gidudahang mamaligyaay og ginadiling drugas pasado alas-12 sa tungang gabii diha sa sitio Mangga, barangay Mambaling dakbayan sa Sugbo.
Ang biktima nailhan nga si Ronald Precillas Abellanosa alyas Tayuy, 35, molupyo sa maong lugar samtang kini nagduwa og tong-its diha sa bakanteng luna nga gipanag-iya usab ni Trifina Estrada.
Giingong kalit lang nga adunay tawo nga mipatim-aw ug sa walay igong hinungdan kalit lang nga gipusil ang biktima hinungdan nga mikaratil og dagan ang duha ka silingan sa biktima nga iyang kadula.
Apan wala pa matagbaw ang maong mamumuno gipaulanan niini og bala ang biktima bisan natumba na kini ug pagkahuman daling miikyas palayo sa dapit. Sa crime scene nakuha ang upat ka kabhang sa kalibre .45 ug upat usab sa deformed slug sa maong armas.
Ang bag-ong hepe sa kapolisan sa Homicide Section nga si Chief Insp. Sarah Jean Recla mibutyag nga nakakuha sila og impormasyon nga tigpayuhot og ginadiling drugas ang biktima.
Dako usab ang pagtuo ni Recla nga posibleng adunay atraso ang biktima sa drugas hinungdan nga gipusil kini. “Base sa impormasyon nga atong nakuha, tiggamitan ug tigpayuhot usab siya og ginadiling drugas,” matud pa ni Recla. (BANAT NEWS)