Nagbinasolay kinsay sad-an sa kahuot sa trapiko

CEBU, Philippines - Nagbinasolay ang duha ka ahensiya sa gobiyerno ug ang kontraktor kabahin sa kahuot sa dagan   sa trapiko sa tiilan sa Marcelo Fernan Bridge nunot sa nagpadayong pag-ayo sa karsada. Kini atol sa tigum sa Mactan Cebu Bridge Management Board (MCBMB) nga gipatawag sa tsirman nga si Gob. Gwendolyn Garcia sa Kapitolyo kagahapon human siya mismo naapektahan sa trapiko.

Lakip sa gipatambong sa tigum mao ang representante sa PB Obial Construction nga maoy nagpahigayon sa proyekto nga iya sa Department of Public Works and Highways (DPWH).

Giangkon ni Engr. Rachel Lumapas, construction engineer DPWH-7 nga wala sila nakig-alayon sa lokal nga kagamhanan labot sa pagpatuman sa plano. Matud pa ni Lumapas nga si Edwin Ermac, ang hepe sa Traffic Enforcement and Management (TEAM) sa dakbayan sa Mandaue dili motubag sa ilang tawag butang nga gihimakak sa maong opisyal sa kapolisan.

Matud pa ni Ermac nga kung wala nakontak ang iyang telepono, mahimong adtoon siya personal sa iyang buhatan. Atol sa tigum sa MCBMB, dunay sugyot nga ang pagbubo sa semento sa karsada dili himuon sa peak hours.

Matud pa ni Aurora Obial nga gimandoan sila sa DPWH nga paspasan ang trabaho hinungdan nga 24/7 kini nilang gibuhat aron mahuman ang proyekto sunod buwan, mas sayo sa gikatakda untang paghuman sa Pebrero sunod tuig. Ang DPWH gikatahong mipadali sa trabaho aron dili maabtan sa misa pasalamat kang Pedro Calungsod karong Nobiyembre 20.

Buot makita ni Garcia ang plano aron mahan-ay kung unsay buhaton sa mga lokal nga kagamhanan nga maluag ang dagan sa trapiko bisan magpadayon ang pagtrabaho sa proyekto. (BANAT NEWS)