"Backer" system sa PNP recruitment maoy hinungdan?

CEBU, Philippines - Kapin sa 200 ka mga aplikante sa pagkapulis ang nanghuyhoy ang abaga sa kasagmuyo human katunga sa gidawat nga mga aplikante sa Police Regional Office (PRO-7) wala na makapaubos sa neurological exam.

Usa sa mga aplikante ang mipadayag sa iyang kasagmuyo ug mibutyag nga hilabihan nilang paninguha nga makasulod sa pagkapulis apan wala sila hatagi sa kahigayonan ug nawad-an na og paglaom.

“Sa kataas nako, wala na tay pag-asa ani nga makasirbi, ingon sila gahapon nga katong wala makapasar next year na lang. Katong wala mabasa, wala kuno masulod sa quota,” matud sa maong aplikante kansang pangalan wala maapil sa gibasa.

Wala kalikaying kadaghanan kanila ang nakasaway tungod kay dunay mga aplikanteng sa ilang tan-aw mas kwalipikado pa sila nga mao hinuoy nangadawat maong nagduda silang mipasulabi gyud ang “backer” system.

“Amo gikahiubsan nganong wala mi gipa-take ba (sa neuro-exam),” matud pa niini. Ang neuro-exam mao ang eksaminasyon pagtino kung husto ba og paminsar ang aplikante.

Samtang si Sr. Supt Patroneli Baldebrin, hepe sa Regional Human Resource Development office mihimakak sa mga pagduda sa maong aplikante tungod kay dili lang usa o duha ka opisyal ang mopaubos sa examination sa mga aplikante.

Dugang pa ni Baldebrin nga ang ilang quota karun gamay lang gani gatos kapin lang ang ilang kuhaon nga pulis kini bisan pa man og adunay 251 ka mga aplikante ang nakasulod sa neurology test. “Atong quota karun gamay ra man, daghan og aplikante unya gi-rank man gud na sila nagbase na sa ilang eligibility, score sa ilang board, ang priority gyud is ang board passers,” pasabot pa ni Baldebrin. (BANAT NEWS)