6 drayber nga adik sikop

CEBU, Philippines - Unom ka mga drayber sa jeepney ang nagpositibo na usab sa gipahigayong roadside random drug testing sa Land Transportation Office (LTO)-7.

Sulod sa singkwenta ka mga drayber unom niini ang nagpositibo diin gikasagmuyo sa director sa LTO-7 Raul Aguilos tungod kay bisan pa man sa kadugay na nila sa paghimo sa roadside random drug testing duna gihapoy wala moseryoso niini.

Dugang pa ni Aguilos nga dili sila mohunong sa pagpahigayon og roadside random drug testing hangtud nga dili mahurot ang mga drug addicts nga drayber.

“Padayonon namo ang roadside drug test sa mga public utility vehicle drivers aron mawagtang ang mga adis-adis sa mga public utility vehicles,” matud pa ni Aguilos pinaagi sa text.

Butyag usab ni Aguilos nga hilabihan kaayo ka risgo sa mga pasahero kun ang drayber usa ka adik.

“Hinaot unta nga ang mga drivers magmatngon nga naa sila obligasyon ug responsibilidad paghatag og tarong ug hapsay nga serbisyo publiko,” pasabot pa ni Aguilos.

Ang mga drayber nga masakpang tiggamitan og ilegal nga drugas awtomatikong kuhaan sa ilang lisensya ug suspensuhon kini samtang gihimoan pa og confirmatory test ang resulta.

Dili sila tugotang maka-drive kun mamatud-ang positibo sila sa confirmatory test gawas lang kung nakapa-rehabilitate sila.  (BANAT NEWS)