2 ka anak ni Alcover mokandidato

CEBU, Philippines - Si Partylist Representative Pastor “Jun” Alcover sa Alliance for National Democracy (ANAD) mitakda nga mopahuway na sa politika apan motugpo sa iyang duha ka anak nga magmayor sa lungsod ug konsehal sa syudad sa Sugbo karon umaabot nga election sa tuig 2013.

Si Alcover mibutyag sa Banat News atol sa induction sa mga opisyal sa Cebu Association of Media Practitioners (CAMP) didto sa Cebu Waterfront sa miaging Sabado nga ang iyang anak nga si Lemar Alcover maoy iyang padaganon isip mayor sa lungsod sa Tabogon, sa amihanang bahin sa lalawigan, samtang si Pastor “Jung-Jung”Alcover molansar usab isip konsehal sa amihanang distrito sa dakbayan sa Sugbo ubos sa Team Rama.

Si Lemar kinsa konsehal sa Sambag 2 sa dakbayan sa Sugbo, maoy kasamtangang district coordinator sa Lakas-Christian Muslim Democrats (CMG) sa ika-upat nga distrito sa lalawigan sa Sugbo.

Samtang si Jung-Jung kasamtangan usab nga kapitan sa barangay Agsungot, usa ka bukirang barangay sa dakbayan sa Sugbo.

Gisukit kun unsay kasigurohan nga modaog ang duha ka mga anak niini sa bugno sa politika sa umaabot nga piniliay, si Alcover nagkanayon nga wala siya magduha-duha sa kadaogan sa iyang anak nga si Lemar pagka-mayor sa Tabogon, tungod kay una sa tanan daghan ang kaliwat sa iyang asawa sa maong lungsod tungod kay didto kini matawo ug taga Tabogon kini og kaliwat.

Gawas niini matud pa ni Alcover nga ang kalig-on sa mosuporta kang Lemar nga si Kongresista Benhur Salimbangon sa ika-upat nga distrito sa lalawigan sa Sugbo ug kaniya mismo isip kongresista sa ANAD Partylist, maoy pipila sa kasigurohan sa kadaogan ni Lemar didto sa Tabogon.

Usa sa nalantawan ni Alcover nga gusto niyang si Lemar maoy mahimong mayor sa Tabogon, mao nga aron    makabaton og maayong kauswagan ang maong lungsod nga sa pagkakaron nagpabilin sa kahubo sa mga maayong proyekto gumikan sa wala magkadimao nga pagdumala sa kasamtangang pamunoan sa lungsod sa pagpanguna ni Mayor Eusebio Dungog.

Samtang sa bahin ni Jung-Jung, nakita ni Alcover nga ang iyang anak may kaugalingong balwarte sa bukirang mga barangay kansang mga botante katunga sa mga botante sa kapatagang lugar sa dakbayan sa Sugbo.

Mibahad si Alcover nga tungod kay iyang mga anak ang mokandidato karong umaabot nga piniliay, isip amahan ibubo niya ang huygo todo niyang suporta buwahan    may katugyanan siyang mga anak nga mopuli sa iyang mga tunob sa adlaw sa iyang pagpahuway gikan sa politika.(Wen Celen) (BANATNEWS)