Demolisyon sa Brgy. Luz wa mahinayon

CEBU, Philippines - Wala mahinayon ang gitakdang demolisyon sa pipila ka mga balay sa tulo ka mga sitio sa Barangay Luz kagahapon gumikan kay gipaabot pa ni Regional Trial Court Judge Ramon Daomilas sa Branch 11 ang resolusyon sa konseho sa dakbayan nga mohatag og katungod ni Mayor Michael Rama nga paliton sa siyudad ang lote nga maapektohan sa maong lakang. Mahibaw-an pa hinuon ang tubag niini ugmang adlawa atol sa sesyon sa konseho.

Ang sunod nga pagpaminaw sa maong kaso gitakda karong Biyernes, September 28 busa nakulbaan na pag-ayo ang 32 ka pamilya nga maapektohan sa demolisyon.

Kahinumdoman, ang executive department miduso og mosyon aron sa pagpahunong sa   demolisyon ug hatagan og igong panahon ang pagdungog sa kaso.

Samtang ang pangulo sa Nasudnong Katawhang Kabos (Nakabos) nga si Evangeline Abejo mibutyag nga padayon karon nga gihimo sa Division for the Welfare of the Urban Poor (DWUP) ang tanang pamaagi aron masulbad na ang maong problema.

Ang mga maapektohan sa demolisyon naglangkob sa mga nagpuyo sa sitio Langka, sitio Mabuhay ug sitio Lubi.

Matud pa ni Abejo nga usa sa pamaagi nga gisugyot sa mga maapektohan sa demolisyon mao ang pagpalit sa kagamhanan sa siyudad sa luna nga ilang gipuy-an ug adto nalang usab sila mobayad sa data-data nga paagi sa kagamhanan.

Una nga gipadayag ni Abejo nga ang maong mga luna gipanag-iya sa nasudnong kagamhanan ubos sa Community Mortage Program.

Nagkanayon si Abejo nga kasagaran sa maapektohan sa demolisyon nagpuyo na sa maong dapit sukad pa niadtong 1958 busa gusto nilang pakamatyan ang maong lugar.  (Sanden J. Anadia/WC) (BANATNEWS)