Mga turista higpit nga bantayan

CEBU, Philippines - Gumikan sa pagkalumos sa duha ka langyaw’ng turista sa kadagatan sa Lapulapu ug sa Bohol sa miaging adlaw, nakahukom   ang mga tourist police sa dakbayan sa Lapulapu nga higpitan nila ang pagbantay sa mga turista sa ilang lugar.

Kini ang gipadayag ni PO2 Antonio Maglangit, sakop sa tourist police sa Banat News kagahapon. Matud pa niya   nga kasagaran sa mga langyaw’ng turista sa Lapulapu mao ang mga Hapon, Koreano, Insek ug mga Amerikano.

Ang maong lakang nahukman nga tumanon sa kapolisan human malumos ang usa ka Koreano ug usa ka Hapon sa miaging adlaw.

Ang   mga nakalas kay nalumos mao si Hyo Sim Ahn, 63,   Korean national, nga nagpuyo sa dakbayan apan didto malumos sa Pandanon Island sa lalawigan sa Bohol ug ang Hapon nga si Ken Ji, 39, nga nagpuyo sa Anemone Hotel sa Buyong, Maribago sa dakbayan sa Lapulapu.

Si Ken giingong nag-snorkeling uban sa duha ka Japanese national ug usa ka Filipina apan namatikdan nalang sa mga kauban nga naglutaw na sa kadagatan ang biktima mga 30 metros ang gilay-on gikan  sa baybayon.

Gumikan niini gitakda ni Mayor Paz Radaza nga imbistigahon ang beach resort nga nalumsan sa Hapon kun kompleto ba kini sa mga kahimanan sama sa life guard ug uban pa. (Romeo T. Limpangog/WC) (BANATNEWS)