Gillamac may mohulip na sa MCPO

CEBU, Philippines - Pormal nang gipahibalo ni Mandaue City Mayor Jonas Cortes ang iyang napiliang bag-ong director sa kapolisan sa dakbayan sa Mandaue.

Si Sr. Supt. Petronelli Baldebrin maoy napilian ni Cortes gumikan sa mga maayong agi niini sa pamulis ug wala usab kini makasugat og mga kontrobersiya sa iyang serbisyo.

Lakip si outgoing MCPO director Sr. Supt. Noel Gillamac mihatag usab sa iyang rekomendasyon ngadto ni Cortes nga si Baldebrin nga iyang classmate pagsulod sa kapolisan maoy pilion.

Si Gillamac maoy gihugonhugonang mohulip sa pwestong biyaan ni Baldebrin sa Police Regional Office-7.

Miluwat na sa iyang leave of absence si Gillamac karong semanaha ug posibleng sa pagbalik niini ipahigayon na ang pormal nga turnover tali nila ni Baldebrin.

Samtang si Cortes sa iyang bahin mapasalamaton sa maayong serbisyo nga gihatag ni Gillamac sa MCPO ug nanghinaut kini nga susama ang maayong pagdumala ni Baldebrin ubos sa iyang termino.

Gipasalig ni Cortes nga suportahan ang MCPO ilabi na sa mga operational expenses alang sa kahapsay ug kalinaw sa dakbayan sa Mandaue. (Bong Soriano/EIM) (BANATNEWS)