Upat nahilo sa "uhong"

CEBU, Philippines - Upat ka sakop sa banay ug ilang usa ka silingan ang nalandig sa tambalanan human nangahilo sa gikaong “ihi-ihi” nga uhong niadtong Domingo sa gabii sa sitio Toril sa barangay Tingub sa dakbayan sa Mandaue.

Ang nangahilo nailhan nga sila si Margie Basalo, 23, iyang kapuyo nga si Leonides Durano, 2-anyos nga anak nga si Leojie Durano, si Josejun Basalo ug ang ilang silingan nga si Benjie Monte nga maoy giingong naghatod sa maong sud-an nga gituohan nilang uhong.

Nasayran matud pa niadtong adlaw’ng Domingo si Marjie padung nang magluto sa ilang panihapon dihang miabot ilang silingan si Monte ug naghatod sa maong “uhong” ug mao nalang kini ilang giluto nga gisagulan og kamunggay.

Human niini gisaw-an kini tibuok banay lakip na si Monte nga midungan sa ilang panihapon.

Apan pipila lang ka minuto ang milabay gikan sa ilang pagkaon nagsugod na og suka ang ilang 2-anyos nga anak ni Durano ug sunod nga misuka ang magtiayon apil na silang Monte, Basalo ug Margie.

Daling nanangpit sa mga silingan ang upat ug gidala sa tambalanan lakip na ang ilang gikaon.

Ang doktor nga miatiman kanila nagkanayon nga dili uhong ang ilang nakaon apan “ihi-ihi” diay kadto nga moturok sa dapit diin mangihi ang iro nga susama gihapon sa kaliwat sa fungi nga pamilya sa mga uhong apan dili kini makaon.

Si Monte mibutyag nga sa duol sa sapa nga labayanan og basura sa mga residente sa maong dapit niya nakuha ang maong mga uhong.

Matud pa ni Josejun kun nahibaw-an pa lamang niya kun asa gikuha ang maong uhong di gyud siya mokaon niadto. Hinuon si Margie, iyang anak ug si Josejun ang nakagawas na’s tambalanan samtang sila si Durano ug Monte na lamang ang nagpabilin sa Cortes General Hospital.(Flor Perolina/EIM) (BANAT NEWS)