Molugos unta sa silingan tiklo

CEBU, Philippines - Gidakop sa kapolisan ang usa ka empleyado sa 4th Engineering District sa Department of Public Works and Highways (DPWH ) human ireklamo sa usa ka 21 anyos nga dalaga nga iyang silingan nga misuway kuno og lugos kaniya didto sa ilang balay sa lungsod sa Dalaguete niadtong Sabado sa alas 7:20 sa gabii.

Ang suspek nga nagtingkagol   karon sa prisohan giila sa kapolisan nga usa ka Boy(di tinuod niyang ngalan), 23, ulitawo ug nagtrabaho sa DPWH 4th Engineering district nga nagbase sa maong lungsod.

Si SPO1 Veronico Centino, Desk Officer sa Dalaguete Police Station mibutyag sa Banat News   nga ang biktima nga ginganlan lang nila og Inday, dalaga nga may kapuyo, mipasangil nga nag-inusara ra siya sa ilang balay sa maong higayon   dihang kalit lang misud ang suspek nga way pananghid.

Matud pa sa biktima nga puwerting kurata niya dihang gilayug siya og deretso niini ug buot na unta siyang among- amongan   ug maayo nalang kay nakalugnot   siya busa mikabad siya og dagan paingon sa gawas sa ilang balay ug mideretso   ngadto   sa buhatan sa kapolisan ug gisumbong ang maong hitabo.

Sila si PO3 Cristopher Requina ug mga kaubanan   maoy miresponde sa maong alarma ug pag-abot nila sa maong lugar positibong gitumbok sa biktima ang suspek   busa gisikop dayon kini sa kapolisan ug gibalhug sa prisohan. Gitakdang pasakaan   na kini og kasong attempted rape   karong adlawa. (/WC) (BANAT NEWS)