Siyudad mihangyo sa korte ibasura ang kaso sa Cestoda

CEBU, Philippines - Gihangyo sa siyudad sa Sugbo ang korte sa pagbasura sa kasong sibil nga gipasaka sa transport group batok sa siyudad tungod kay wala’y igong basehan ang maong kaso.

Gikwestiyon sa mga gikiha ang maong lakang sa Cebu South Transport Operators and Drivers Association (CESTODA) nganong karon pa sila mipasaka og reklamo batok sa pagpatuman sa City Ordinance 1663 nga dugay nang napatuman. Ang maong ordinansa nagdili sa rotang 43-D nga makasulod sa dalan F. Llamas ug Sabellano Streets sa siyudad sa Sugbo.

Gawas sa siyudad gikiha usab sila si Mayor Michael Rama, Cebu City Traffic Operations Management (CITOM) executive director Atty. Rafael Christopher Yap.

Matud nila nga wala sila’y nakitang rason nga ang naapektahan og maayo ang CESTODA dihang wala na sila pasudla sa maong mga dalan.

Nangatarungan ang siyudad nga ang tumong sa ordinansa nga madumala og maayo ang trapiko sa maong dapit tungod kay naghuot na kini og maayo.

Ubos sa balaod, ang City of Cebu dunay gahom sa pag-regulate sa traffic sa ilang hurisdiksyon base sa Republic Act 3857 ug Local Government Code 1991.

Ang CESTODA mipasaka sa kaso dihang wala na sila pasudla sa maong mga dalan nga matud pa nila kalapasan sa gilatid sa ilang mga prangkisa nga Minglanilla-Basak via Mohon-Sabellano ug F. Llamas Streets and vice versa.

Apan ang siyudad mipasabot nga dili sukaranan ang Certificate of Public Convenience (CPC) nga gihimong basehan sa CESTODA tungod kay ubos sa CPC ang mga operators kinahanglang motuman sa rules and regulations nga naglakip sa pagsunod sa mga ordinansa.

Ang gikiha miingon nga dili usab igong basehan ang paggamit sa mga commuters nga usa ka rason kay naay mga tricycles nga nag-operate sa F. Llamas and Sabellano Streets.

Ang tigpamaba sa CESTODA nga si Eric Eminido nagkanayon nga ang City Ordinance 1663 usa ka violation sa ilang franchise route ug apektado niini ang publiko. EIM (BANATNEWS)