Philpost nakig-abin sa pribadong sector

CEBU, Philippines - Ang Philippine Postal Corporation (PhilPost) sa Visayas midasig sa serbisyo niini pinaagi sa pagpakig-alayon sa ubang ahensya sa gobiyerno ug pribadong sektor ug misagop sa modernong teknolohiya.

Matud pa ni PhilPost Director for Operations Ben Quiros nga sa pagkakaron ila nang gipalambo ang ilang sistema sa ilang serbisyo pinaagi sa electronic mailing diin ang ipadala nga mail sa PhilPost mahimo nang sutaon sa magpadala sa internet aron sayron kun hain na kini mahimutang. Sa nasayran ang PhilPost nakig-alayon usab sa i-BAYAD ug mahimo na kining modawat og bayad   sa kuryente ug tubig.

Ang PhilPost midawat na sa bayad sa Metro Cebu Water District (MCWD) apan kini anaa lamang sa upat ka dagkong lugar sama sa Cebu Central, siyudad sa Mandaue, siyudad sa Lapu-lapu ug usab siyudad sa Talisay.

Sumala pa ni Quiros nga gawas sa MCWD, may ubang ahensya usab sa gobiyerno ug pribadong sektor nga nagpakita sa interes niini sa pagpakig-alayon kanila sa paghatod og serbisyo ngadto sa publiko partikular na sa balayrunon ug mailing services. WC (BANATNEWS)