Archival magpabilin sa puwesto

CEBU, Philippines - Gibutyag kagahapon ni Mayor Michael Rama nga magpabilin gihapon sa iyang puwesto si kanhi konsehal Nestor Archival isip head sa Technical Working Group sa Bus Rapid Transit Project sa siyudad bisan pa sa pagkamembro niini sa line-up sa Bando Osmeña Pundok Kauswagan (BOPK) alang sa pagka-konsehal sa amihanang distrito sa sunod tuig nga bugnong lugaynon.

Gitataw ni Rama nga nagpasabot lang kini nga wala siya mamolitika ug gipatigbabaw gyud niya ang iyang prinsipyo sa panarbaho ug dili mamersonal. Suma pa sa mayor nga adunay kapasidad si Archival sa gihatag niya nga puwesto niini.

Masaligon hinuon si Rama nga dili maapektohan ang trabaho ni Archival bisan pa man nga naa kini sa BOPK. Sayo niini pormal na nga gianunsyo sa Team Rama ang kompleto nila nga line-up alang sa sunod tuig nga pinilay ingon man usab ang BOPK nga gipangulohan ni Kongresista Tomas Osmeña kinsa magpasubli pagka-mayor.

Gikataw-an lang ni Rama ang migawas nga mga estorya gikan sa iyang mga kritiko kinsa mihingalan kaniyang traydor gumikan sa iyang pagbiya sa BOPK.

Gitataw sa mayor nga dili siya matawag nga traydor gumikan kay dili siya maoy mipahawa kundili, siya maoy gipapahawa dihang  giinsulto siya ug wala na   ilha kaniadto nga sakop sa maong partido busa wala niya ipamugos ang iyang kaugalingon nga magpabilin pa sa maong partido.

Nagsugod ang tanan dihang ang mga trabaho ni Rama isip mayor maoy hilabtan na ni Osmeña  kinsa nagdumala lang sa habagatang distrito sa dakbayan sa Sugbo ngadto sa hawanan sa kongreso. WC (BANATNEWS)