Mosyon batok demolisyon sa taga Apas gipasaka

CEBU, Philippines - Human nipagawas ang korte og demolition order ngadto sa mga residente sa tulo ka sitio sa Barangay Luz, ang siyudad sa Sugbu misang-at dayon og urgent motion sa pagpahunong sa maong demolisyon.

Si Atty. Leslie Reyes sa siyudad sa Sugbo mibasol sa Homeowners Associations (HOAs) sa pagsumitir sa lista sa mga tawong buot mo-takeover sa mga luna diin ang actual occupants nagpuyo.

Matud niya ang kalangay sa maong HOAs maoy nakaingon nga nalangay usab ang negosasyon sa plano untang pagpalit sa maong luna nga maoy papuy-an sa 29 ka apektado nga pamilya.

Tungod niini walay rason ang korte aron dalidalion ang pagresolba sa kaso aron imando ang writ of demolition.

Si Reyes nagkanayon nga hangtod wala pay desisyon ang City Council kung tugutan si Mayor Michael Rama pagpalit sa maong luna gihangyo nila ang korte sa pagluwat og status quo order aron pugngan ang demolisyon karong Lunes.

Si Judge Ramon Daomilas sa Regional Trial Court Branch 11 miluwat sa demolisyon order niadtong Septiyembre 21, 2012.

Matod niya bisan sa kataas sa panahon nga iyang gihatag sa City of Cebu, ang City Legal Officer napakyas pagpahibalo sa korte sa baruganan sa siyudad kung paliton o dili ang maong luna sa mga kasamtangang namuyo.

Kahinumduman nga ang mga apektadong pamilya sa Sitio Mabuhay, Nangka ug Lubi mipasaka og kasong sibil batok sa ilang homeowners association aron himuon imbalido ang kontrata ug certificates of title sa mga lote nga gihikay niini. Subling husayon ang mosyon sa siyudad karong Lunes sa buntag. EIM (BANATNEWS)