Naigo sa kilat
CEBU, Philippines - Usa ka lalaki ang namatay human kini maigo og kilat samtang nanginhas kauban ang iyang amahan ug uban pang mga mananagat sa hunasan sa baybayon sa barangay Gairan sa siyudad sa Bogo niadtong Biyernes sa buntag.
Base sa gipadalang report sa Bogo City Police Station diha sa Cebu Provincial Police Office patay nang nadangat sa Bogo Provincial Hospital si Jessie Ancot Sam,31, may mga anak.
Si PO3 Jim Susvilla nga gikahinabi sa Banat News walay ulan niadtong tungora apan nagpunay og pangilat ilabi na sa kadagatan.
Matud pa ni Susvilla nga kauban ni Sam ang iyang amahang si Jerry,56, kinsa distansya og gibarugan diha sa dagat sa gikahimutangan ni Jessie kinsa niadtong tungora nanginhas usab.
“Wala man siya’y samad, kalit raman daw siya natumba pagkilat,” matud pang Susvilla. Ang papa ni Sam nga si Jerry gikatahong nakabatyag usab og kuryenteng milatay sa iyang lawas atol sa maong hitabo.
Nahibulong nalang kini sa paglibot niya og tan-aw sa dapit diin manginhas ang anak wala na kini didto hinungdan sa kabalaka niini ug nagpatabang sa mga uban pang nanginhas pagpangita sa iyang anak.
Dihang ilaha kining napalgan wala na kini panimuot ug dali nilang gidala sa tambalanan apan ang mga doktor mideklarar nga patay na. (BANATNEWS)
- Latest
- Trending
