5 ka tawo namatay sa dagat

CEBU, Philippines - Duha ka mga langyaw nga turista, ug tulo ka laing mga tawo ang nangamatay sa dagat kagahapon ug niadtong Biyernes sa siyudad sa Lapulapu ug sa amihanang bahin sa Sugbo. Korean ug Hapon

Sa Olango Island, sa dakbayan sa Lapulapu nakalas ang usa ka 63-anyos nga Koreana nga si Hyo Kim Ahn, taga South Korea nga usa ka turista ug temporaryong nagpuyo sa usa ka uptown hotel sa siyudad sa Sugbo. Miabot siya dinhi niadtong Septiyembre 12.

Si SPO2 Winston Ybañez sa pakighinabi sa Banat News mibutyag nga ang mga kauban ni Hyo nga mga Koreanong turista mitug-an nga nag-island hopping ug snorkeling sila luwan sa usa ka pumpboat sa Olango Island. Pag-abot nila sa barangay Talima nga usa sa mga paboritong dapit sa mga mag-snorkel milayat kini dayon sa dagat nga nagtangag sa snorkel.

Apan gikatahong nasudlan ug nasigop ni Hyo ang tubig-dagat diha sa tubo sa iyang snorkel ug nakuyapan hinungdan nga dali kining gidala sa Mactan Doctors Hospital apan gideklarar nga patay na.

Giingong nahitabo ang pagkalumos niini pasado alas-12 sa udto apan hapit duha ka oras na una pa mapahibalo ang kapolisan nga gidala kini sa maong tambalanan.

Samtang pagkaalas-3 sa hapon gihapon kagahapon, usa na usab ka Hapones nga turista ang nalumos samtang nag-snorkel gihapon sa laing pumpboat nga nag-island hopping diha sa Pandanon Island sa Lapulapu.

Ang nalumos giilang si Kenji Inamasu, 39, lumad nga taga Fukouka, Japan kinsa miabot dinhi sa Sugbo niadto lang Septiyembre 19 aron manuroy ug temporaryong nagpuyo sa usa ka hotel sa barangay Buyong sa maong siyudad.

Matud pang Ybañez, ang kauban ni Inamasu mibutyag nga nagtuo silang nagtiaw-tiaw lang kini nga nagkulob ug naglutaw nga wala maglihok ug nagpabungolbungol lang sa ilang pagsangpit.

Apan dihang ilang gisusi nahibaw-an nga nagbuwa na ang baba niini ug patay na hinungdan nga ilang gidala sa tambalanan apan patay na.

Si Ybañez nagkanayon nga ilang susihon kung duna bay tulubagon ang mga boat operators sa maong mga aksidente. Gihuwat nalang usab nila ang mga representante sa travel agencies sa maong mga turista alang sa pagpahibalo sa mga kabanay nila didto sa ilang mga nasud. (BANATNEWS)