P2.5M gisakiyo sa mga trabahante sa gasolinahan
CEBU, Philippines - Nabankaruta karon ang usa ka gasolinahan human giingong nakuhaan og P2.5 milyon sa tulo ka mga empleyado niini lakip ang supervisor sukad pa niadtong 2010.
Ang tag-iya mismo sa GV’s New Lacion Gas Station, nga si Allan Varga, maoy nakasakop sa modus operandi sa tulo ka kawani human niya kalit nga gibisita ang gas station niadtong Miyerkules sa udto.
Kasong qualified theft napasaka na sa korte batok nila ni Kathleen Kate Bantiles, 22, taga-Liloan ug cashier; Jemmil Noval, 28, taga-Barangay Poblacion Occidental ug pump boy; ug ang supervisor nga si Cliffer Paler, 23, taga-Barangay Casili, Consolacion.
Matud ni SPO3 Roy Susvilla, imbestigador, adunay concerned citizen nga nag-text ni Varga ug nagpahibalong adunay binuang sa maong gasolinahan hinungdan nga kalit niya kining gibisita.
Sumala pa ni Susvilla nahibaw-an ni Varga nga gimanipula sa mga suspetsado ang calibration sa gasolina labi na ang sales reports niini.
“Kung ang calibration worth P10 ilang ibutang sa sales records P30, so duna sila’y P20 nga ginansiya,” matud ni Susvilla.
Human sa interogasyon sa kapolisan miangkon ang tulo sa ilang binuang ug si Bantiles giingong miuli og P10,000, si Noval miuli usab og P17,000 kang Varga. Apan si Paler mibutyag nga ang kwarta nga iyang nakuha giingong gipadala na niya sa Leyte.
Ang maong gasoline station nagsugod og operate niadtong June 2012 ug ang maong modus operandi nagsugod na sa buwan sa Agosto sa maong tuig. Si Varga matud pa sa kapolisan nagplanong sirad-an ang maong gas station gumikan kay wala na siya’y ikapuhunan pa niini. (BANAT NEWS)
- Latest
- Trending
