Priso naghikog kay kapuyo may laing uyab

CEBU, Philippines - Nagbitay na ug wala nay kinabuhi ang usa ka piniriso sulod sa karsel sa Tudela Police Station kagahapon sa buntag dihang nadiskubrehan niining may lain nang hinigugma ang iyang live-in partner.

Patay nang naabtan sa kapulisan si Cilfredo Fabroa, 28, taga-Barangay Villahermosa, dihang gisusi sa pulis mga alas 5:00 sa buntag kagahapon.

Si Insp. Eduard Sanchez, hepe sa Tudela Police Station, mibutyag nga gisigehan niya og tambag si Fabroa nga magpabiling lig-on sa mga pagsulay apan motando lamang kini.

Giingong gimonitor ni Sanchez matag karon ug unya si Fabroa aron mapugngan ang plano niining maghikog gani buntag nang nangatulog ang mga pulis.

Apan dihang naalinggat ang nagbantay ni Fabroa mikuha kini og pisi dayong higot sa liog hinungdan sa hinanaling kamatayon niini.

Daling gidala sa kapulisan si Fabroa sa Ricardo M. Maningo Memorial Hospital sa lungsod sa San Francisco apan gideklarar kini nga dead on arrival.

Sa gibiling suicide note ni Fabroa, siya nagmahay sa nahitabo sa iyang kinabuhi nga

gilimbungan sa iyang kaipon. Nagpasalamat usab siya sa kaayo sa mga pulis kaniya.Si Fabroa napriso kini sa human madakpi sa kapulisan sa kasong robbery niadtong Abril. (BANAT NEWS)